Blog

  • Nga Agim XHAFKA – SPAK-u, Kulaku dhe Hetues Spartaku

    Më erdhi ndër mend ky vargëzim emrash nga leximi i plotë i 500 faqeve të akuzës kundër Sali Berishës dhe Jamarbër Malltezit. Kam qeshur plot herë siç dhe jam indinjuar qindra herë. Dhe konkluzioni? Një vërë në ujë, e thotë bukur populli ynë trim dhe liridashës.

    Po pse mo, me paratë që paguan Argita për shpenzimet mjekësore të Berishës do provoni korrupsionin, ju të SPAK-ut? Me sponsorizimet për shërimin e plot fëmijëve në atdhe do argumentoni se familja Berisha ka grabitur? Me kthimin e pronës të Malltezit te Malltezi do provoni që u vodh pasuria e këtij vendi? Ndaj u indinjova. Por dhe qesha. Se më erdhi në kujtesë një episod nga drejtësia e Enverit, që e kam lexuar diku. Ia vlen ta paralelizoj se kjo e sotmja është fiks, ose motamo, ose tamam, ose tëpkë, ose njësoj si drejtësia e Edverit. E Edi Ramës d.m.th që na e shiti Reformën në Drejtësi si verë cilësore dhe po e shijojmë si uthull të shpëlarë.

    Ja ç’ka ndodhur 60 vjet para, që SPAK e ka kopjuar pa bërë fare ndryshime.

    Në një fshat të Korçës duhej të futej patjetër në burg Bedriu. Ishte fshatar i mesëm, por që kishte reputacion në fshat dhe po mendohej se do bëhej pengesë për krijimin e kooperativës. Donin ta futnin në burg, por nuk po gjenin asnjë provë. Plot prokurorë dështuan, e Partia lart donte urgjent të arrestohej Bedriu. Në ato çaste ngutjeje, doli vullnetar prokuror Spartaku.

    -Për 12 orë gjej unë prova të forta,- u zotua.

    Dhe nuk vonoi. Sa ra nata, te qymezi i pulave të Bedriut hodhi brenda një foto të Enver Hoxhës. Në mëngjes shkoi atje me policë. Bënë kontroll në shtëpi dhe më pas në qymez. Nga andej një polic doli me portretin e Enverit, që mezi njihej. Se e kishin dhjerë pulat. Glasat qenë kudo dhe dukej që qenë të freskëta, të ngrohta. Kaq mjaftoi. Prova: glasat te fytyra e diktatorit. U quajt armik, agjent i Amerikës dhe u dënua mbi këto glasa që gjeti Spartaku.

    Ndaj më erdhi ndër mend vargëzimi SPAK-u, Kulaku dhe Prokuror Spartaku. Njësoj edhe 500 faqet e akuzës ndaj Berishës. Mbushur me glasa mllefi e urrejtje ndaj Berishës. Madje më keq. Mllef, inat e urrejtje ndaj Familjes Berisha.

  • E BUJSHME – Revolucion kundër kancerit të mushkërive: testohet vaksina e parë

    E BUJSHME – Revolucion kundër kancerit të mushkërive: testohet vaksina e parë

    Është një risi absolute që premton (në afat të gjatë) që të shpëtojë mijëra e mijëra jetë dhe të parandalojë një nga kanceret më të frikshëm dhe më të përhapur në glob. Në Mbretërinë e Bashkuar kanë filluar provat për vaksinën e parë kundër kancerit të mushkërive duke përdorur Messenger RNA. Doza e parë, është injektuar tashmë tek një pacient dhe premton ta vrasë sëmundjen, si dhe ta parandalojë përsëritjen e saj.

    Si funksionon

    Në detaj, kjo vaksinë prodhohet nga kompania BioNTech dhe për momentin quhet BNT116: veprimi i saj bën që të mund të trajtohet efektivitet ekstrem kanceri direkt në mushkëri e jo nëpër qeliza të vogla, që është forma më e zakonshme e sëmundjes. Faza një e eksperimentimit tashmë ka filluar nëpër tridhjetë e katër laboratorë kërkimorë në shtatë vende të ndryshme: në Shtetet e Bashkuara, në Mbretërinë e Bashkuar, Gjermani, Hungari, Poloni, Spanjë dhe Turqi. Siç thamë, doza e parë iu injektua pacientit Një të martën e kaluar në Mbretërinë e Bashkuar ku ndodhen shtatë laboratorë midis Anglisë dhe Uellsit.

    Kujt do t’i injektohet?

    Tani për tani, do të jenë rreth 130 pacientë që do të marrin dozën e vaksinës: bëhet fjalë për të sëmurë në fazën fillestare që nuk kanë filluar ende trajtimin me radioterapi dhe as i janë nënshtruar ndërhyrjeve kirurgjikale, por vaksina do t’u jiper edhe atyre pacientëve në fazë të avancuar të cilëve tumori iu është rishfaqur sërish por në këtë rast ata do ta marrin bashkë me imunoterapinë. Falë Messenger RNA, e njëjta teknikë e përdorur edhe për Covid-19, kjo vaksinë do të jetë në gjendje të stimulojë trupin për të luftuar qelizat tumorale falë një shënjuesi preçiz të quajtur Nsclc.

    Kush është pacienti Një

    Pacienti i parë quhet Janusz Racz, është 67 vjeç dhe zbuloi se kishte kancer në mushkëri majin e kaluar kur filloi menjëherë trajtimin me kimioterapi dhe radioterapi. Racz ka marrë tashmë gjashtë doza në rreth gjysmë ore në National Institute for Health Research UCLH Clinical Research Facility. Sipas praktikës, ai do të duhet të marrë të paktën një dozë vaksine çdo shtatë ditë për gjashtë javët e ardhshme dhe më pas t’i nënshtrohet një reduktimi me një dozë çdo tre javë për afërsisht një vit të rresht (54 javë).

    Objektivat e reja

    Kështu, vaksina, do të duhet të shërbejë kryesisht për të stimuluar reagimin ndaj qelizave të sëmura dhe për t’i lënë të paprekura ato të shëndetshmet me diferencë të jashtzakonshme në krahasim me kimioterapinë që i “vret” të gjitha pa dallim. “Po hyjmë në këtë erë të re dhe entuziazmante të studimeve klinike mbi imunoterapinë e bazuar në mRNA për të studiuar trajtimin e kancerit të mushkërive”, ka deklaruar Siow Ming Lee, mjek konsulent onkolog në University College të Londrës, i cili drejton ekspermentin. “Është e thjeshtë për t’u administruar dhe mund të seleksionohen antigjene specifike në qelizën tumorale për t’i goditur më pas”, ka nënvizuar eksperti “Kjo teknologji përfaqëson fazën tjetër të madhe të trajtimit të kancerit”.

    Entuziast edhe zoti Racz, një shkencëtar i specializuar në inteligjencën artificiale, që ka dhënë menjëherë dritën jeshile për të marrë pjesë në eksperiment. “Jam edhe unë shkencëtar dhe e kuptoj që përparimi i shkencës, veçanërisht në mjekësi, qëndron në faktin që njerëzit të pranojnë të marrin pjesë në këto kërkime”.

    Përgatiti për Gazetatjetër.net, Dardan MITROVICA

  • Nga Oerd BYLYKBASHI – 100 kontenierë me mbetje toksike para turinjve të SPAK

    Nga Oerd BYLYKBASHI – 100 kontenierë me mbetje toksike para turinjve të SPAK

    100 kontenierë me mbetje toksike. Jo një, por 100! Dhe nuk janë 1 e 2 kontenierë të trafikuar herë pas here të shtrirë në kohë që do të donte muaj, në mos vite, që të mund t’i “rrëshqasësh” kontrabandë deri në Tajlandë. 100 kontenierë njëherazi janë një mal!

    Sikur minimumi 20 ton secili (kapacitetin e kanë 28 ton), janë 2000 ton. Është si të hipë një elefant në autobus e të mos e shohë njeri.

    Po si hynë në portin e Durrësit, një zonë me shumë kontrolle, këta 100 kontenierë me qindra apo mijëra ton material të rrezikshëm?

    Nëse materiali ka hyrë si rifuxho me kamion, janë qindra kamionë në rresht që e kanë shkarkuar materialin në një apo më shumë sheshe të mirë përcaktuar për mallra të tillë. Më pas është ngarkuar me vinç në 100 kontenierë për disa ditë. Më pas i kanë lëvizur 100 kontenierë me kamionë deri në terminalin e kontenierëve e më pas i kanë ngarkuar në dy anije.

    Dhjetëra punonjës, shoferë, agjentë spedicionerë, doganierë, personel i portit, policë dhe punonjës sigurie janë përfshirë, pa llogaritur dhjetëra kamera sigurie që monitorojnë çdo centimetër katror të portit apo skanerat modernë. Pra. e pamundur të mos dihej se çfarë ishte.

    Apo mos vallë materiali toksik ka hyrë direkt me kontenier i paketuar më parë në origjinë? Përsëri, dhjetëra persona punonjës privatë dhe zyrtarë në portin e Durrësit kanë dijeni për vargun e gjatë të kamionëve që sollën 100 konteinerë.

    Edhe nëse kanë harruar ata, asgjë nuk hyn në port pa lënë gjurmë në disa lloje dokumentesh zyrtare që ruhen në disa institucione të ndryshme në port.

    Apo mos kanë hyrë kontenierë me atë material toksik nga jashtë? Po ne kemi një ligj që ndalon importin e mbetjeve!

    Kush importoi, kush zhdoganoi, kush bëri së paku një kontroll të atyre 100 kontenierëve në shkelje të ligjit?

    Kur dhe ku u depozituan në shkelje të ligjit?

    Sërish dhjetëra persona zyrtarë e privatë kanë dijeni. Manifesti i anijes, dokumenti kryesor, që shoqëron çdo mjet e mall depozitohet në agjencinë që përpunon anijen, në doganë, port, etj, pra në disa institucione.

    Nuk ka shans që një kapiten anijeje të mos dijë që 100 kontenierë u ngarkuan sepse manifesti i anijes përmban çdo mjet apo kontenier dhe mallin që ka brenda, kush e nis e kush e pret, në cilin port ku do ndalojë anija.

    Askush nuk mund të thotë që kontenierët janë bosh, sepse dallohet menjëherë nga zhytja e anijes që është e mirëpërcaktuar.Një peshë e tillë duhet vendosur e balancuar në anije për një udhëtim oqeanik deri në Tailandë. Dikush ia ka mbyllur gojën dhe sytë ekuipazhit.

    Ku do të magazinohen 100 kontenierët që po kthehen sërish në Shqipëri? Nëse ato janë të rrezikshme në Tajlandë, janë të rrezikshme edhe ne Durrës apo kudo në Shqipëri.

    Si mund të hyjnë në port, të shkarkohen e të kryejnë procedurat doganore kur ligji nuk e lejon?

    Para pak vitesh, një sasi e madhe plehu kimik, e sekuestruar nga një anije në portin e Beirutit, e bllokuar në magazinë në port, mori zjarr dhe shkaktoi një nga shpërthimet më të mëdha duke vrarë njerëz e shkatërruar qindra ndërtesa.

    Këta 100 kontenierë që do të bllokohen, sa rrezik përbëjnë për durrsakët apo qytetarët e zonës ku do magazinohen?! Këta kontenierë me mbetje të rrezikshme.

    Pyetje të tilla ka pa fund. Por të gjitha kanë një konkluzion: jemi përpara një kompleksi veprash penale, por ajo që shohim është heshtja e prokurorisë.

    Gjurmët, provat dokumentare,dëshmitarët janë ngado nëpër port apo edhe nëpër ministri e agjenci shtetërore qendrore.

    A është kjo thjesht një kontrabandë e një subjekti privat? Qesharake!

    Nuk ka shans që një kompani sado e madhe, t’ia “rrëshkasë” nën hundë 100 kontenierë në një dorë të vetme shtetit.

    Paska korruptuar ajo kaq shumë zyrtarë shtetërorë pa e ditur drejtuesit e portit, të doganës, policisë apo kapitenerisë?!

    A është krimi i organizuar shqiptar?

    Po mbetjet e cilës kompani shqiptare po trafikojnë?

    Çfarë industrie e jona ka prodhuar këto mbetje të rrezikshme?

    Mbetjeve i korrespondon edhe një sasi e madhe produkti e prodhuar, magazinuar dhe fiskalizuar e më pas tregtuar.

    Çfarë na paska prodhuar kjo kompani që dilkan kaq shume mbetje të rrezikshme?

    Sa kohë paska që depozitohen këto mbetje, ku janë depozituar në pritje të trafikimit?

    Çfarë ndikimi kanë pasur në njerëz e ambient?

    Inspektoratet përkatëse të mjedisit, tatimeve etj, ku kanë qenë?

    A është trafik i paligjshëm ndërkombëtar mbetjesh të rrezikshme ku tipikisht mafia ndërkombëtare transnacionale është e përfshirë dhe tipikisht bën “joint-venture” me mafien lokale për të korruptuar zyrtarët e ndryshëm?

    Po deri sa lart kanë arritur?

    Cilët ashensorë pushteti kanë ngjitur nga Autoriteti Portual, Dogana, Kapiteneria apo Policia drejt majave të pushtetit në qeveri?

    Cilët ministra linje përfshihen?

    Po Shërbimi Informativ Shtetëror,që e penetron portin në çdo qelizë, çfarë ka raportuar?

    E pamundur që në atë mori personash të përfshirë, të mos ketë “kënduar” asnjë person.

    Raporti çohet në Tiranë dhe çdo ditë, si rregull, Kryeministri merr raport nga SHISH. Në një shtet ku pushtetet duhet të ishin të ndara, do të ishte e pamundur t’i kapësh të gjithë në një dorë e t’ua mbyllësh sytë e gojën.

    Në një shtet ku pushteti bazohet mbi patronazhimin politik në qelizë dhe kapjen e çdo pushteti nga Kryeministri me emërime militante, korrupsion apo presion, 100 kontenierë mund edhe të zhduken, jo thjesht të trafikohen.

    A është rastësi që dje, më 20 gusht 2024, qeveria publikoi një projektligj të ri që lejon importin e mbetjeve, pas zhurmës për referendum në 2012 dhe shfuqizimit të ligjit në 2013? 100 kontenierë po kthehen pas në Shqipëri dhe pa një ligj që i lejon të hyjnë, ato nuk mund të shkarkohen.

    Kjo nuk është rastësi apo koinçidencë kohore. Kjo tradhton çdo alibi që Rama dhe qeveria nuk dinin gjë. Një projektligj po heq me urgjencë heq traun e ndalimit të hyrjes së mbetjeve të rrezikshme me lejen e Kryeministrit.

    Fundja kush ka një pushtet të tillë veç atij që kalon 17 vendime qeverie në një ditë për inceneratorët, fal portin e Durrësit për ndërtim pallatesh, portin që sot është skena e krimit më të fundit me trafik mbetjesh të rrezikshme?!

    Kush veç atij që shpërndan qindra milionë euro investime me PPP, rreh pronarët kur i nxjerr nga shtëpitë për t’i hapur sheshin klientëve, që u bllokon rrugën dhjetëra mijëra banorëve në Fushë Krujë e Krujë që duan të shkojnë në shtëpi apo bizneset e tyre, që jep leje për kulla gjigante që pastrojnë para e kur protestojnë njerëzit, i mbyt me gaz apo i arreston natën pse kërkuan të drejtën?!

    Kush veç atij që çedon sovranitet për mbështetje ndërkombëtare si në Shëngjin apo e jep Sazanin si biçikletën e vet?!

    Dikur të gjitha rrugët çonin në Romë. Sot të gjitha pistat të çojnë te Rama.

    SPAK nuk ka si i shpëton kësaj mega-dosjeje penale.

    Këta 100 kontenierë nuk janë qerpiku që zakonisht dallon SPAK, por trau ne sy. Veç nëse reforma nuk ia ka plasur sytë.

  • Nga Luçiano BOÇI – ‘Turisti’ që na tregon Shqipërinë

    Kjo puna e turistëve nuk po na shqitet nga rrjetet. Një luftë e paparë midis çadrave këtë vit dukshëm bosh dhe propagandës boshe frenetike që komandohet nga vetë ai “Turisti” i cili s’le vend të botës pa shëtitur me Ismailin e tij, diku për nje ndeshje basketbolli, ose finale futbolli, shpesh dhe për një “fërgesë n’Shalës” dhe pasi ka mbaruar turizmin e tij vjetor vjen e na tregon turizmin këtu.

    Mirë që ve në rresht të gjithë ministrat, drejtorët, patronazhistët e ish-ët të cilët janë bë si “arusha fotografë”, që turren të dielave rërave të plazheve për të kapur video e foto, po gjen dhe peshkon ndonjë italiano “vero” që na e poston në fcb-në e tij, për të na treguar ne shqiptarëve se ç’është dhe si është turizmi këtu tek ne.

    A thua ne nuk e dijmë apo s’e nuk dijmë ta shijojmë. Na u dashka ai italiani me orë 30.000 euro në dorë. Pale sa ka në xhep apo llogari.

    Njësoj sikur t’i tregonte një shqiptar, por me orë imitim kinez në dorë, italianëve se si është Italia e turizmi në Itali.

    Këta të fundit do shqyheshin gazit, sepse turisti shqiptar nuk do mundte sado të donte, të rrëfente të plotë, mënyrën e organizmit, përkujdesjes, qetësisë, sjelljes, e siteve që të ofron Italia.

    Ndërsa ne shqyhemi gazit nga italiani i Kryeturistit, sepse dukshëm kërkon të na tregojë arat tona, të na flasë për një realitet që e njohim mirë, brenda të cilit të qënit turist shoqërohet me një varg vuajtjesh e kalvaresh.

    E në këtë realitet, gjithçka është ndryshe nga propaganda.

    Vetëm bukuria natyrore është e vërtetë.

    Jo rrallëherë pushimet apo turizmi kthehet në një stres e lodhje në formë tjetër.

    Pluhuri e zhurmat nuk të ndahen asnjë çast, me pak përjashtime vendesh ku qëndron parija e këtij shteti humbamen.

    Plehrat i ke ngado dhe të shoqërojnë më çdo orë të ditës, pavarësisht përkushtimit të privatit.

    Mos harroni zhurmat muzikore ku njëri ia kërcet popullore e tjetri rock.

    Për të mos folur për çmimet të cilat janë të papërballueshme për pjesën dërmuese të turistëve tanë dhe pse jo dhe të një pjese low cost turistësh të huaj.

    Por Kryeturisti nuk e sheh realitetin dhe vazhdon avazin e “dhisë së zgjebosur me bishtin përpjetë”, duke shpërdarë pamje me retushime kohe e vendesh e duke folur për industri turizmi në vend të një kaosi industrial turistik.

    Ndërsa i bie gjoksit për këtë turizëm, nuk u thotë asgjë njerëzve për fitimet e kësaj “industrie” për njerëzit. E vërteta është se të ardhurat e korrura janë krejt minimale.

    Nuk u tregon dhe se shumica e atyre që vijnë nuk kthehen më sërish.

    Nuk kthehen sepse nuk kemi atë industri të reklamuar që i tërheq vazhdimisht turistët, por kemi vetëm kuriozitet turistik që fashitet me një vizitë të vetme.

    E nuk u thotë një gjë themelore fare, që shkatërrimi i turizmit është vepër dhe pasojë e grabitjes sistematike qe ai i ka bërë përgjatë këtyre viteve bukurive turistike të Shqipërisë.

    Dhe ajo që ndodh sot rëndom është ikja e shiptarëve me pak të ardhura nga Shqipëria, por dhe ikja për turizëm e atyre shiptarëve me disi e shumë të ardhura, për shkak të mungesës së industrisë së turizmit dhe instalimit të grabitjes turistike.

  • Nga Basir ÇOLLAKU – Kur Rama të bjerë nga Kali, nuk do të ketë Gomar t’ju mbrojë!

    Nga Basir ÇOLLAKU – Kur Rama të bjerë nga Kali, nuk do të ketë Gomar t’ju mbrojë!

    Policia e Shtetit po djersit për të mbuluar ngjarjet kriminale. Zyra e njoftimeve të Ramës prodhon alibitë. Pas vrasjes në Pogradec, plagosja te Komuna e Parisit në Tiranë bën policinë telef përsëri. Dje Rrumbullaku, sot është Tonin Voci drejtori i Tiranës tek jep lajmin se foli me autorin. Një turbullirë informative. Kjo po ndodh shpesh kohët e fundit.

    I nderuar drejtor, lëre nganjëherë prokurorin të pyesë të akuzuarit, autorët e vrasjeve e të plagosjeve. Ka policë të mirë e të ndershëm shumë. Prokurorë të tillë ka mjaft. Gjyqtarë gjithashtu jo pak. Lërini të punojnë. Sepse, kur Rama të bjerë nga Kali e do bëjë vaki më shpejt se fantazia e një mandati tjetër, s’ka Gomar të mbrojë askënd nga zullumet.

    Drejtori i Përgjithshëm Muhamet Rrumbullaku kapërceu veten ku përveç gjysëm deklarimeve të pavërteta sulmoi medien me tekstin e kryeministrit. Njëlloj si paraardhës Veliu para shkarkimit. S’e kishte bërë kurrë më parë.

    Irena andej matanë nga Struktura e Posaçme nuk di ku të gjejë mbrojtje për ligjshkeljet me porosi partie.

    Kur të pëlcasë publikisht këneta sky-encro, Rama nuk di kë të mbrojë më parë: veten apo vëlla Olsin?! Oborrtarët ministra?! Bashkiak Velinë?! Biznesmenët ku aksionet e shumë investimeve kanë mistere pronësie?! Prokurorë e gjyqtarë që e kanë sajdisur me yesmenllëk?! Bandat borxhlie për mandate deputetësh apo vendoresh?! Strategjikët me shtrat droge të investimeve me një këmbë në qeli?!.

    Zyrtarë publikë! Ruani veten mos dalldisni pas oreksit të qeveritarit në vepra penale, në shpërdorime detyre, në korrupsion, aq më keq në krim të organizuar apo në grupe të strukturuara për të qejfosur atë, në organizata mafie për të shëndoshur llogaritë e tij.

    Mos kini iluzione. Ai do të shesë këdo, madje edhe të vëllanë, Olsin, nëse rrezikon të transferojë fundshpinën e tij në kafaz.

    Aksioma për t’u mbajtur mend është kollaj: kur Rama të bjerë nga Kali, nuk do të ketë Gomar t’ju mbrojë!!

  • MotoGP, Bagnaia arrin legjendën Schwantz: ja 10 fituesit më të mëdhenj të MotoGP

    MotoGP, Bagnaia arrin legjendën Schwantz: ja 10 fituesit më të mëdhenj të MotoGP

    Me fitoren në Austri, kampioni aktual i Ducatit futet në top 10 pilotët me më shumë fitore në historinë e dyrrotëshit. Nga Doohan te Marquez, nga Agostini te Rossi, ja kush janë fituesit më të mëdhenj në historinë e MotoGP

    Fitorja e shtatë e 2024 e arritur të djelën ka një vlerë të veçantë për Francesco Bagnaia. Nuk feston vetëm kreun e Botërorit, rifituar në kurriz të Jorge Martinit: duke triumfuar në Austri, kampioni i Ducatit shënoi suksesin numër 25 në kategorinë e lartë të motorëve, duke kaluar legjendën Kevin Schwantz. Kësisoj, Pecco hyn ndër 10 pilotët me më shumë fitore në historinë e dyrrotëshit midis 500 dhe MotoGP. Në këtë renditje bëjnë pjesë përbindësha të shenjtë të MotoGP, si Mick Doohan dhe Giacomo Agostini, por edhe rivalë dhe mjeshtra, si Marc Marquez dhe Valentino Rossi. Ja cilët janë 10 pilotët më fitues të historisë së MotoGP.

    10) Kevin Schwantz

    Triumfi në Austri i bën të mundur Bagnaia-s të arrijë 25 fitore në klasin më të lartë të garave të motorëve, aq sa edhe Kevin Schwantz. Amerikani, i pranishëm në 500 nga viti 1986 deri në 1995, gjithmonë i lidhur me Moto Suzuki, me të cilën i arriti të gjitha sukseset e tij dhe titullin kampion më 1993. Sezoni më fitues i Kevin ishte 1989: Schwantz firmosi gjashtë fitore në 14 gara, por, çuditërisht, përfundoi vetëm i katërti në Botëror.

    9) Eddie Lawson

    Ndalesa tjetër e Bagnaia-s për t’u ngjitur në radhët e fituesve të mëdhenj është Eddie Lawson. Katër herë kampion bote në 500, tre me Yamaha dhe një me Honda, amerikani krenohet me 31 fitore në kategorinë më të lartë. Sezonet më të fituese ishin 1986 dhe 1988. Në të dyja rastet, Lawson i mbylli me shtatë fitore dhe me titullin e kampionit të Botës në fund të kampionatit. Eddie është edhe një nga të paktët pilotë që ka arritur të fitojë të paktën një garë me tre marka të ndryshme: përveç Yamaha dhe Honda, në fakt ai arriti një fitore edhe me Cagiva, në GP të Holandës 1992.

    8) Daniel Pedrosa

    Edhe pse nuk e ka fituar kurrë titullin në MotoGP, Daniel Pedrosa mbetet një nga më fituesit në kategorinë më të lartë. Spanjolli ka arritur të korrë 31 suksese midis viteve 2006 dhe 2017, të gjitha të ardhur kur pilotonte me Honda, markë me të cilën ka qenë i lidhur përgjatë gjithë karrierës. Mbajtës i një titulli botëror në 125 dhe dy në 250, Pedrosa e pati sezonin e tij më të mirë në klasin e lartë më 2012: shtatë fitore dhe një vend të dytë.

    7) Mike Hailwood

    Karriera e Mike Hailwood është e zbukuruar me 37 fitore në 500. Britaniku, i ndarë nga jeta më 1981, ishte i pamposhtur midis viteve 1962 dhe 1965, kur formoi me MV Agusta një kombinim të pamposhtur. Viti më fitues për nëntë herë kampionin e botës ishte 1965: tetë fitore dhe titulli i katërt rradhazi. Hailwood bën pjesë edhe në klubit e ngushtë të pilotëve të aftë për të fituar me tre motorë të ndryshme, me Norton, MV Agusta dhe Honda.

    6) Casey Stoner

    Francesco Bagnaia e ka kaluar atë mes pilotëve më fitues me Ducati, por Casey Stoner mbetet përpara për sa i përket sukseseve të përgjithshme në MotoGP, 38. Australiani ka fituar dy herë Kampionatin Botëror, më 2007 dhe 2011, fillimisht me markën italiane dhe më pas në drejtim të Honda. Sezone të paharrueshme dhe jo vetëm për titujt e kampionit të botë: në fakt, në të dyja rastet, Stoner e mbylli kampionatin me nga 10 suksese.

    5) Jorge Lorenzo

    Tre tituj dhe 47 fitore: pak pilotë mund të mburren me vitrinën e Jorge Lorenzo në MotoGP. Spanjolli, fitues edhe në 250 për dy vjet, ka qenë protagonist në kategorinë më të lartë nga 2008 deri më 2019. Dhe ndër këto 12 sezone, ai më fituesi ka qenë 2010: nëntë fitore në vitin e fitimit të titullit të tij të parë në MotoGP. 47 perlat e Lorenzo kanë ardhur me dy motorë të ndryshme, që janë Yamaha dhe Ducati.

    4) Mick Doohan

    Mick Doohan ka qenë piloti më fitues në klasin 500 të viteve ’90, siç dëshmohet nga 54 triumfet e tij. Të gjitha këto fitore, së bashku me pesë titujt botërorë të fituar gjatë viteve 1994-1998, u arritën me Honda, motor të cilit i qëndroi besnik gjatë gjithë karrierës së tij. Viti më dominues i australianit ishte padyshim 1997: Doohan fitoi 12 nga 15 garat e planifikuara.

    3) Marc Marquez

    Për 59 herë MotoGP ka parë Marc Marquez të triumfojë. Spanjolli u zhvllokua që në debutimin e tij më 2013, duke u përsëritur më pas thuajse pa ndërprerje deri më 2021. I jashtëzakonshëm sezoni 2014, me 13 fitore, 10 prej të cilave të njëpasnjëshme. Një rekord për kategorinë më të lartë. Përveç 59 fitoreve, edhe gjashtë titujt e fituar në klasën më të lartë kanë ardhur vetëm me Honda. Megjithatë, Marquez, shpreson të dalë sërish nga ngërçi me Ducati-n, duke ia rinisur serisë së ndërprerë.

    2) Giacomo Agostini

    Plot 68 gara të firmosura nga Giacomo Agostini: është ky bilanci i kampionit italian në vetëm klasin 500, mbretërimi i tij zgjati për tetë vjet. 15-herë kampioni i botës krenohet me një rekord të bujshëm. Në fakt, për tre vite radhazi Agostini i fitoi të 10 garat e sezonit. Edhe Giacomo ka arritur të triumfojë me dy motorë të ndryshme: përveç binomit catch-all me MV Agusta, italiani u imponua edhe me Yamaha.

    1) Valentino Rossi

    Piloti më i suksesshëm në histori, në klasin më të lartë është Valentino Rossi me 89 fitore. E para prej tyre, në GP të Britanisë së Madhe, daton më 2000, kur ende quhej kampionati i klasit 500. Konvertimi në MotoGP nuk e pengoi kampionin italian të vazhdonte të triumfonte. Janë shtatë titujt e tij në kategorinë më të lartë, një në 500 dhe gjashtë në atë aktual. Sezonet më të fituese për Rossin kanë qenë më 2002 me Honda dhe 2008 me Yamaha: në të dyja rastet plot 11 fitore sezonale.

  • Nga Kim MEHMETI – Sa më të dobët janë shqiptarët, aq më e fortë është Maqedonia?!

    Nëse e vlerëson nëpërmjet veprimeve politike të zyrtarëve të Shkupit, ke përshtypjen se ata më shumë kujdesen që të mos i dëmtojnë interesat serbe sesa ato maqedonase.

    Dhe ndoshta edhe nuk kanë zgjidhje tjetër ngaqë Serbia, aq mire e ka ngërthyer në kthetrat e veta këtë vend, sa që pa mbështetjen e Beogradit në Maqedoni nuk mund të bëhesh as këngëtar i njohur, e jo më politikanë apo biznesmenë i suksesshëm.

    Dhe ndoshta emblema më e përshtatshme njohëse për këtë vend do mund të ishte ‘gjyshja’ Presidente e RMV, e cila ndërtoi karrierë politike duke ndërruar parti si dhe duke e mëkuar dhe ushqyer te populli maqedonas idenë se sa më të dobët janë politikisht e ekonomikisht shqiptarët e këtushëm, aq më i fortë është shteti dhe maqedonasit në të?!

    Kalimthi thënë, presidentja e sotme e RMV është nga të fundit që e morri vesh se Jugosllavia e Titos ishte zhbërë dhe kurrë më nuk do rimëkëmbej. Andaj edhe mbeti jugonostalgjike e pashërueshme, e cila edhe gjatë kohë do e vuajë pamundësinë që si dikur, me vëllezërit serb, bashkarish ta luftojnë rrezikun e natyrshëm të tyre – shqiptarinë!

    Por e gjithë kjo e vërtetë nuk VLEN gjë për pushtetarët e sotëm shqiptarë, të cilët siç duket, as që i intereson se nga është katandisur RVM, por vetëm sa ajo u mundëson t’i mbushin xhepat dhe të mbrojnë pasurinë që e siguruan në të shkuarën duke e zhvatur popullin e vet, edhe atë o si ish kryetarë komunash, o si  ministra e drejtorë të ndërmarrjeve publike ku i mbante vetëm një vlerë – emblema e BDI’së!

    Por sidoqoftë, shqiptarët e Maqedonisë arritën një sukses të madh në zgjedhjet e fundit parlamentare : u çliruan nga robëria dydekadëshe ‘leniniste’ e BDI’së.

    Tani atyre u mbetet ta pastrojnë oborrin e vet politik nga mbeturinat e kësaj diktature, nga ata që duke ndryshuar flamurin pariak, janë të gatshëm t’i shërbejnë cilit do sunduesi maqedonas që do ua mbrojë pasurinë e siguruar nga vazalizmi i deridjeshëm nën emblemën e BDI’së dhe që do ua shpërblejë shtrenjtë këtë të sotmin. 

    E ndërkohë ne të tjerët duhet ta kuptojmë se ai që ia do të keqen Maqedonisë nuk duhet t’i kritikojë burrështetasit e saj, por duhet atyre t’ua ushqejë iluzionin shkatërrimtarë për vendin se dobësimi i shqiptarëve, e forcon shtetin?!

  • Nga Ylli MANJANI – Operacioni ishte i suksesshëm, pacienti vdiq

    E vërteta është që vettingu ishte operacion i thellë dhe largoi goxha tumor nga sistemi.

    Është gjithashtu e vërtetë që bashkë me tumorin, ky operacion largoi edhe inde të shëndetshme të organeve vitale të sistemit. U larguan pa asnjë motiv bindës, kushtetues jo e jo, gjykatës e prokurorë që nuk ishin tumori i sistemit.

    Kjo e ka dëmtuar shumë sistemin dhe besueshmërinë e vettingut e të reformës.

    Ç’është më e keqja fare, operacioni i vetting ka lënë në sistem me vendim të formës së prerë ende qeliza metastatike nga tumori i vjetër. Këto qeliza janë të pangopshme deri sa të saturohen e të bëhen tumor i madh sa ai që hoqëm. (Ka drejtësi por është pak e shtrenjtë – tha dikush).

    Pra ku vajtëm?

    Hiçgjëkundi.

    Ç’reformë bëmë?

    Një vërrë në ujë.

    Sa iu nxihet jeta njerëzve kot për të pritur pafundësisht për një vendim.

    ***

    Jam, pa asnjë dyshim, i mendimit se ligjet e administrimit të sistemit duhen riparë sa më shpejt.

    I duhet hapur rruga rivitalizimit të tij. Ka dosje pa fund që presin të gjykohen. Njerëz në rradha të gjata dhe në kundërgarë edhe me jetën që presin….

    Gjykatësit e prokurorët që u larguan nga detyra pa iu vlerësuar pasuria sipas kriterit kushtetues të dyfishit të pasurisë, duhen rikthyer në detyrë.

    Duhet vendosur në zbatim një kriter i dakordësuar në Kushtetutë, në fund të fundit. Përse kasapët e operacionit të vettingut qenkan mbi Kushtetutën?!

    Sistemit i duhen burime njerëzore jo deklarata politike e populiste. As ëndrralla aleatësh, ambasadorësh apo ekspertësht pa emër.

    As shkolla e magistraturës nuk i plotëson dot nevojat emergjente të sistemit për njerëz. Jo vetëm në numër burimesh njerëzore, por edhe në përvojën jetësore e profesionale. Drejtësia ka nevojë shumë për këtë të fundit.

    Më në fund, siç edhe e pamë, a u luftua korrupsioni apo u thellua pas vetting-ut?! Edhe raportet e shtetit të ambasadorëve “reformatorë” thonë se korrupsioni u shtua!!! Ja pra që duhet terapi tjetër dhe jo ndërhyrje kasapësh politikë.

  • Shkëlqimi dhe rënia e drejtorëve të Bashkisë së Tiranës

    Shkëlqimi dhe rënia e drejtorëve të Bashkisë së Tiranës

    Kryebashkiaku Erion Veliaj u distancua nga akuzat që rëndojnë për ish-drejtorët me të cilët ka bashkëpunuar prej nëntë vitesh. Ish-drejtorët dyshohen se ushqyen me punë publike një kompani fiktive, paratë e së cilës i dërguan gjetkë.

    Pas disa vitesh në krye të dikastereve publike një grup drejtorësh të Bashkisë Tiranë u shfaqën si investitorë dhe sipërmarrës të suksesshëm në ndërtim e turizëm. Prokuroria e Posaçme dyshon se suksesi i tyre buron nga një skemë abuzive me tenderat.

    Drejtorët dyshohet se ushqyen me punë publikë një kompani fiktive, paratë e përfituara prej së cilës i investuan gjetkë. Deri më sot SPAK-u ka proceduar penalisht të paktën gjashtë drejtorë: Redi Molla – ish-drejtor i UKT-së, Mariglen Qato – ish-drejtor i IMT-së, Taulant Tusha – ish-drejtor i Punëve Publike, Eglantina Zere – ish-drejtore e Tirana Parkingut, Enton Punavija – ish-drejtor i Transportit, Deborah Keçi – ish-drejtore e Klubit Sportiv Tirana.

    Gjykata e Posaçme miratoi në mars të këtij viti tre masa sigurie “arrest me burg” për  Mollën, Tushën,  Qaton, dhe gjashtë masa të tjera sigurie “detyrim paraqitje” për zyrtarë të tjerë të përfshirë në këtë aferë.

    Në njoftimin e SPAK-ut thuhet se Redi Molla dhe Mariglen Qato përgjatë kohës që ushtronin funksionin e drejtorit kanë shpallur fitues shoqërinë “5D Konstruksion” sh.p.k. në 11 tendera nga viti 2016 deri në 2020. SPAK-u ka prova se kjo shoqëri zotërohej nga 3 persona të cilët ishin ortakë fiktivë, ndërsa ortakët e vërtetë dhe pronarët ishin “drejtorët”.

    Pas arrestimit të zyrtarëve të Bashkisë së Tiranës, kryebashkiaku Erion Veliaj u distancua nga aktiviteti i ish-drejtorëve me të cilët ka bashkëpunuar prej nëntë vitesh. Në një mesazh të shpërndarë në rrjetet sociale, Veliaj sqaroi se ai nuk ka marrë kurrë asnjë përfitim nga tenderat për të cilët akuzohen ish-bashkëpunëtorët dhe se nuk e ka shkelur ligjin asnjëherë.

    Të akuzuarit janë pjesë e dosjes për të cilën SPAK-u ka nisur hetimet në prill 2023 për veprat penale “shkelja e barazisë së pjesëmarrësve në tendera dhe në ankande publike” dhe “korrupsioni pasiv i personave që ushtrojnë funksione publike”, si dhe kallëzimit që opozita bëri një muaj më pas, në maj 2023. Të dy procedimet penale u bashkuan në një procedim penal të vetëm, të numërtuar me nr.75 viti 2023.

    Një Bukëpjekës Pronar i “5D”

    Një furrë buke buzë rrugës “Fatmir Haxhiu” në Tiranë prej vitesh është ndalesë për shumicën e qytetarëve që presin urbanin në stacionin e “Rrugës së Elbasanit”. Mjeshtëria e prodhimeve të këtij biznesi familjar përfshin përvojën e bukëpjekësve të vjetër Vjollca dhe Muhamet Petriti, vajzës dhe dhëndrit të tyre.

    Por përtej vetratës me prodhime brumi, familja Petriti duket se mbante fshehur një sipërmarrje paralele me të ardhura të shumëfishta.

    Ishte 11 marsi i vitit 2021 kur mes fluksit të blerësve u shfaq Nestor Muhametllari. Ai kërkoi të takonte Metin, sikurse e thërrasin shkurt bukëpjekësin.Të dy kishin “punë në bankë”. Nestori  pak ditë më parë i kishte dhënë Metit një sasi parash për blerjen e një kompanie. Meti duhej t’i tërhiqte dhe t’ia kthente sërish mikut të tij.

    Këto transaksione janë pjesë e një skeme të cilën SPAK-u dyshon se përfshiu dhëndrin e Metit, Alfred Qato, vëllanë e tij Mariglen Qato, ish-drejtor ky në Bashkinë e Tiranës, kolegun e tij Redi Molla dhe disa zyrtarë të tjerë.

    Hetimet zbuluan se bukëpjekësi Muhamet ishte prej katër vitesh pronar i kompanisë “5D” e cila – deri në mars të vitit 2021 – kur ky ia kaloi Nestor Muhametllarit, gëzoi sukses duke fituar 24 tendera publikë me vlerë prej rreth 1.5 miliardë lekësh (13 milionë euro).

    Por ky sukses ekonomik nuk ndryshoi asgjë në jetën e Metit. Pavarësisht se ishte për katër vite pronar i kompanisë, ai vijoi punën si bukëpjekës me pagë minimale në biznesin e familjes.

    Të dhënat bankare tregojnë se në tre vite (2019-2021), Meti mori rreth 34 milionë lekë (rreth 300 mijë euro) të ardhura si dividend nga kompania “5D”. Megjithatë, prokuroria është e bindur se ai nuk përfitoi asnjë pjesë prej këtyre parave pasi i tërhoqi për llogari të vëllait të dhëndrit dhe miqtë e tij.

    Kryqëzimi i të dhënave të gjetura nga dokumentet e kompanisë dhe punonjësve të saj kanë nxitur prokurorinë të thellojë dyshimet sipas së cilave ish-drejtorët e Bashkisë Tiranë, Qato e Molla, ishin pronarët e vërtetë të kompanisë dhe Meti u përdor për të nxjerrë fitimet për llogari të tyre.

    Bisedat e zbardhura nga prokuroria mes Nestorit dhe dhëndrit të Metit, Alfred Qato, treguan se megjithëse në letra Nestori ishte vartës i Metit, ai nuk kishte asnjë komunikim me të, madje nuk i kishte as numrin e telefonit.

    Ndryshe me dy ish-drejtorët e Bashkisë Tiranë, Qato dhe Molla – nga shtatori 2019 deri në qershor 2023 – Nestori numëroi mbi 1,500 thirrje telefonike me një mesatare prej të paktën një telefonate në ditë.

    Më 29 mars 2024, SPAK-u arrestoi dy ish-drejtorët duke i akuzuar për “korrupsion” dhe “fshehje pasurie”. Paralelisht u ngrit akuza për shkelje të barazisë në tendera për gjashtë ish-zyrtarë të tjerë të Bashkisë Tiranë, mes të cilëve dhe për ish-drejtorin e Drejtorisë së Punëve Publike Taulant Tusha, i cili qe arrestuar në gusht 2023 për shkelje në lidhje me koncesionarin e menaxhimit të mbetjeve të Tiranës.

    Por Gjykata e Posaçme Apelit nuk u pajtua me cilësimet e veprës penale që SPAK-u i bëri veprimtarisë së dyshuar kriminale të dy ish-drejtorëve Qato e Molla. Në vendimin e 3 majit 2024, të disponuar nga SHTEG-u, në të cilin gjykata shqyrtoi apelimet e masave të sigurisë, ajo vlerësoi se ata duhet të procedoheshin penalisht për grup të strukturuar kriminal, përvetësim pasurie publike, pastrim parash dhe evazion fiskal.

    Krijimi dhe ngritja e “5D”-së

    Kompania “5D” u krijua në janar të vitit 2016 nga një mik i vëllezërve Qato, i quajtur Eduard Meta, elektricist, i cili vijoi punët private dhe u shkëput shpejt nga sipërmarrja.

    Për gjashtë vite, deri në nëntor 2022, “5D” do të shpallej fituese në të paktën 32 tenderë publikë me mbi 2.8 miliardë lekë (27 milionë euro) vlerë totale investimi. Në hetimet paraprake, SPAK-u ka gjetur shkelje në thuajse gjysmën e këtyre tenderave.

    “5D” në shumicën e rasteve nuk plotësonte kushtet për të marrë pjesë në garë. Sidoqoftë, ajo shpallej fituese si bashkim operatorësh me kompani të tjera. Pjesa kryesore e tenderave jepej nga Bashkia Tiranë, institucion ky në të cilin Qato dhe Molla kishin kontakte të forta, siç dëshmojnë lidhjet me ish-drejtuesit: Taulant Tusha i Punëve Publike, Enton Punavija i Transportit apo Eglantina Zere e Tirana Parkingut.

    Nga 32 tendera ku u shpall fitues “5D”, 27 ishin në bashkëpunim me 20 kompani të tjera. Ajo bashkëpunoi më së shumti me “Kola Invest” (7 raste) me pronarë sipërmarrësit Jani dhe Sofokli Kola, si dhe “Rroku Guest” (4 raste) që zotërohet nga Vera Gega, bashkëshorte e Rrok Gegës, i dënuar për skemë mashtrimi me faturat tatimore.

    Por “5D” pati bashkëpunime dhe me kompani të mëdha për nga volumi i punëve publike, si: “Fusha” apo “Mane TCI” i sipërmarrësve të njohur Shkëlqim Fusha e Samir Mane.

    Gjykata e Posaçme e Apelit ka konstatuar se në hetimet paraprake SPAK-u nuk verifikoi nëse kompanitë që bashkëpunuan me “5D”-në kishin pasur apo jo dijeni se çfarë përfaqësonte kjo sipërmarrje. Gjithashtu, nuk kishte vlerësim paraprak nëse edhe ato mund të konsideroheshin në aktivitet kriminal si “5D”.

    Pesë tenderat ku “5D” mori pjesë e vetme në garë patën një vlerë relativisht të ulët investimi prej vetëm 88 milionë lekësh (850 mijë euro). Nga këto, tenderi me vlerën më të madhe ishte ai për ndërtimin e një shëtitoreje me korsi biçikletash në zonën e Liqenit të Thatë në Tiranë gjatë vitit 2021.

    SPAK-u dyshon se paratë e fituara nga tenderat publikë prej “5D”-së u nxorën më pas nga kompania për të ushqyer si kapitale investimi sipërmarrje të tjera. Dyshohet gjithashtu se një pjesë e xhiros u nxor jashtë sistemit bankar përmes skemës së pagesave për punë fiktike.

    Hetimet tregojnë se “5D” u regjistrua si biznes pak javë përpara se Mariglen Qato dhe shoku i tij, Redi Molla, të emëroheshin drejtues në Ujësjellës Kanalizimet Tiranë (UKT).

    Molla u emërua drejtor i Përgjithshëm në shkurt 2016, ndërsa Qato, drejtor i Departamentit Mbështetës mesin e muajit mars. Të dy qenë njohur gjatë kohës që punonin në Drejtorinë e Përgjithshme të Rrugëve dhe Ndriçimit Publik në Bashkinë Tiranë.

    Pa bërë gjashtë muaj nga krijimi, në maj të vitit 2016, “5D” fitoi tenderin e parë, pikërisht nga UKT. Ajo u shpall fituese në bashkëpunim me kompaninë “Kola Invest” për ndërtimin e një depoje uji, megjithëse nuk plotësonte kushtet.

    Në komisionin e vlerësimit të ofertave ishte Mariglen Qato, Durim Mustafa dhe Manjola Bunguri, kjo e fundit më vonë do të punësohej në “5D”, ndërsa Mustafa do të përfshihej në marrëdhënie sipërmarrjeje me një ish-drejtor tjetër për ndërtimin e një hoteli në jug. I njëjti komision do ta shpallte fituese kompaninë e kamufluar në të paktën dy tendera të tjerë për ndërtim rrjeti ujësjellësi dhe rikonstruksion kolektori.

    Tenderat e parë ishin në vlera relativisht të vogla, 5-14 milionë lekë, dhe “5D” u fut në bashkëpunim me “Kola Invest” dhe “Rej” të Luan Kaprit, kushëri i ish-kryebashkiakut të Pogradecit Eduart Kapri. SPAK-u ka vënë re se në këto tendera pjesa kryesore e punimeve merrej përsipër nga kompanitë bashkëpunëtore, jo nga “5D”.

    Përvoja duket se nxiti ndryshime. Kompania ishte ngritur, por tashmë duhej riorganizuar për një tjetër nivel. Në vitin 2018 sipërmarrja i kaloi për 100 lekë Muhamet Petritit, vjehrrit të vëllait të Mariglen Qatos. Ndërkohë, administrator u vu Nestor Muhametllari, mik i Redi Mollës. Të dy qenë njohur kur punonin në kompaninë “Gener 2” në vitet 2013-2015.

    Pas ndryshimeve, ku secili nga drejtorët duket se vendosi njerëz të afërt në drejtimin e kompanisë, brenda muajit gusht 2018, “5D” u shpall fitues nga UKT në tre tendera të tjerë. Në dy prej këtyre tenderave, kompania sërish ishte në bashkëpunim me “Kola Invest”. Vlerat e tyre ishin deri katër herë më të larta se të mëparshmet.

    Pesë ditë pas tenderit të fundit në UKT, më 25 gusht 2018, Mariglen Qato u zhvendos me detyrë duke kaluar drejtor i Inspektoratit të Mbrojtjes së Territorit në Bashkinë Tiranë.

    Por do të ishte viti 2019 ai që do të sillte horizonte të reja. “5D” u shpall fituese në katër bashkëpunime me “Rroku Guest”, dy prej të cilave në Bashkinë Shkodër. Si e vetme fitoi një tender në UKT dhe dy tendera të tjerë nga “Tirana Parking”. Në dy nga këta tendera SPAK-u ka gjetur shkelje ndërsa në njërin prej tyre anëtarët e komisionit të vlerësimit të ofertave ishin ish-drejtorët Taulant Tusha dhe Enton Punavija. Ndërkohë, vendimtare në tenderat e “Tirana Parking” dyshohet të ketë qenë ndërhyrja e ish-drejtoreshës Eglantina Zere.

    Gjatë kësaj periudhe në llogarinë e Muhamet Petritit alokohen mbi 34 milionë lekë të ardhura si fitim dividendi, të cilat ai i nxjerr nga banka duke kryer tërheqje të njëpasnjëshme deri në tetorin e vitit 2020. Prokuroria dyshon se këto para iu kaluan Qatos dhe Mollës.

    Në vitin 2020 Molla largohet nga UKT duke kaluar drejtues i një kompanie publike ndërtimi të ngritur nga Bashkia Tiranë të quajtur “Tirana DC”. Megjithatë, kjo nuk i zbehu sukseset e “5D”-së, përkundrazi.

    Në mars 2021, përmes një shitjeje fiktive, “5D” i kaloi në zotërim mikut të Mollës, Nestor Muhametllarit. Mbetet e paqartë nëse me largimin e Muhamet Petritit përfunduan interesat apo lidhjet e Qatos me “5D”-në.

    Pasi mori në zotërim kuotat e Muhamet Petritit në kompani, Muhametllari tërhoqi dividendin e pashpërndarë për vitet e shkuara në vlerë 31.5 milionë lekë (rreth 300 mijë euro). Prokuroria dyshon se këto para iu kaluan Mollës.

    Pas këtyre lëvizjeve “5D” zgjeroi kapacitetin duke u shpallur fituese në 8 tendera gjatë vitit 2021, katër prej tyre tenderave ishin nga programi i rindërtimit ku parashikohej shembja e 22 pallateve dhe ndërtimi i dy shkollave 9-vjeçare “Dritas” dhe “Hasan Vogli”.

    Shembja e pallateve në periferi të Tiranës u shoqërua me akuza të forta nga opozita për manipulime me vlerësimet teknike pas së cilave, sipas opozitës, fshiheshin synime klienteliste ndërtimi.

    Pikërisht në këtë periudhë “5D” u hodh në sektorin e ndërtimit duke marrë lejen e parë për zhvillimin e një pallati 9-katësh në zonën e Yzberishtit në Tiranë. Për dy vite me radhë, deri në vitin 2023, “5D” do të merrte edhe tre leje të tjera ndërtimi në kryeqytet.

    Aktualisht, prej 9 korrikut 2024, “5D” dhe projektet e saj janë vënë nën sekuestro nën dyshimin se kompania u përdor për përvetësim fondesh dhe pastrim parash.

    Nga tenderat tek investimet strategjike

    Në shtator 2020 pesë sipërmarrës u bënë bashkë në një grup investimi për të ndërtuar një hotel 16-katësh pranë portit të Durrësit. Me 87 milionë lekë (700 mijë euro) kapital themeltar, ata morën përsipër ngritjen e një hoteli luksoz, i cili parashikonte 15 milionë euro vlerë investimi.

    Mirëpo grupi duket se fsheh pas një skemë të dyshimtë qarkullimi dhe investimi parash. Hetimet e SPAK-ut kanë nxitur dyshime të arsyeshme sipas të cilave një pjesë e kapitalit themeltar të grupit investitor erdhi nga paratë që u nxorën nga kompania “5D”, gjë e cila ka arsyetuar masën e sekuestros së një pjese të aksioneve vendosur më 9 korrik 2024.

    Ajo që shton dyshimet e SPAK-ut, është fakti se projekti i hotelit i ishte besuar për t’u ndërtuar kompanisë “5D”, duke mbajtur kështu një cikël të mbyllur. Lidhjet mes personave të përfshirë dhe bisedat e zbardhura mes ish-punonjësve të kompanisë rëndojnë më tej pozitat.

    Në këtë rast, përveç lidhjeve me ish-drejtorët Redi Molla e Mariglen Qato, në horizont del dhe një tjetër ish-drejtor i Bashkisë Tiranë, Elvin Tivari, si dhe sipërmarrësi i njohur, Gazmend Haxhia, i cili aktualisht është nën hetim si përfitues nga skema e shpërdorimit të fondeve të Bashkimit Evropian për të cilat po hetohet ish-ministri Ilir Beqaj.

    Më 4 shtator 2020, Gazmend Haxhia, Selim Molla dhe kushërinjtë Dritan Kadiu dhe Elvin e Bledar Tivari firmosën për nismën që u quajt “Mediterranean Investment Group”. Përveç Bledar Tivarit, katër të tjerët u angazhuan në këtë sipërmarrje pas emrave të kompanive të tyre – “Landways International” Haxhia, “Restur” Molla, “Daktur” Kadiu dhe “Etitur” Tivari.

    Molla, Kadiu e Tivari i kishin themeluar kompanitë me 100 lekë kapital themeltar vetëm tre ditë më përpara, më 1 shtator 2020. “Daktur” dhe “Etitur” kishin seli hotel “Lidon”, që zotërohet nga Dritan Kadiu. Ky hotel, te rruga “Aleksandër Goga”, pranë “Rotondos Bizantine” në Durrës, u bë gjithashtu seli e grupit të investimit “Mediterranean”.

    Një muaj pasi formuan grupin e investimit, ata kishin gati projektin e hotelit, ndërsa një vit më vonë firmosën marrëveshje bashkëpunimi për të sjellë në Durrës një markë të njohur të hotelerisë ndërkombëtare. Marrëveshja e veshi hotelin me emrin “Crown Plaza” duke kaluar në hije investitorët e dyshimtë shqiptarë.

    Selim Molla, asokohe 72 vjeç, pa histori sipërmarrjeje nxori nga xhepi 20 milionë lekë (168 mijë euro) për të garantuar 24% të aksioneve të grupit. I ndjeri, ishte baba i Redi Mollës, i cili ia la trashëgim kompaninë “Restur” dhe kuotat në grupin “Mediterranean Investment” pas ndarjes nga jeta në dhjetor 2023.

    SPAK-u dyshon se paratë erdhën nga tërheqjet e dividendit të “5D”-së nga Nestor Muhametllari dhe Muhamet Petriti për llogari të ish-drejtorit të UKT-së, Redi Molla, dhe mikut të tij, gjithashtu ish-drejtor pranë Bashkisë Tiranë, Mariglen Qato.

    Ortaku i Mollës te hoteli në Durrës, ish-vartësi i tij, Elvin Tivari, ka një angazhim të njohur mes administratës publike si drejtor i Departamentit të Shitjeve në UKT dhe sipërmarrjes në tregtinë e kafes, pijeve dhe mallrave me akcizë.

    Në vitin 2018, edhe pse ishte drejtues në UKT, kompania e tij “Gourmet & CO”, fitoi tender për furnizimin e Bashkisë Tiranë me ujë të ambalazhuar.

    Biznesi në turizëm ka ecur vaj për ish-drejtorin e UKT-së Tivari. Ai ka gjetur mundësi të investojë në një tjetër hotel në Dhërmi dhe madje të sigurojë leje për zgjerimin e tij vetëm pak vite pas hapjes.

    Tivari rezulton ortak në hotelin luksoz “La Brisa” në Dhërmi me Fatos Malajn, vëllanë e kryetarit socialist të Bashkisë Mat, Agron Malaj. Ky biznes është regjistruar në vitin 2022 me kapital themeltar 1.5 milionë euro, nga ku 600 mijë euro janë investuar si kontribut i Tivarit.

    Por ky bashkëpunim në sipërmarrje me ish-drejtorin e UKT-së, e ka një zanafillë.

    Malaj zotëron kompaninë e themeluar nga vëllai i tij “Global Security”, e cila rezulton ndër përfitueset kryesore nga tenderimet e institucioneve publike sa i takon sigurisë.

    Në vitin 2017 “Global Security” përfitoi 84 milionë lekë (ose 840 mijë euro) nga tre kontrata shërbimi me negocim direkt prej UKT-së për roje fizike apo roje deposh uji. UKT drejtohej asokohe nga Redi Molla dhe vartës i tij ishte pikërisht Tivari.

    Në periudhën 2017-2021 “Global Security” rezulton përfituese edhe në 13 kontrata të tjera për ruajtje, të dhëna nga Bashkia Tiranë për një total prej 3.6 miliardë lekësh (ose ndryshe 36 milionë euro)./Shteg.org

  • Vizitorë të dehur, qira të larta: ferri i jetesës nëpër zonat turistike evropiane

    Vizitorë të dehur, qira të larta: ferri i jetesës nëpër zonat turistike evropiane

    Në të gjithë Evropën, po rritet pakënaqësia e banorëve vendas me turistët: qytetet transformohen për t’i pritur por pa mbrojtur ata që jetojnë gjithë jetën aty

    Në të gjithë Evropën, është në rritje pakënaqësia e qytetarëve të detyruar të jetojnë me hordhi turistësh gjithnjë e në rritet. Në korrik, nëpër sheshin Palma, në kryeqytetin e Majorkës, zbritën protestues duke mbajtur pankarta me slogane të tilla si “jo turizmit masiv” dhe “turizëm, por jo kështu”. Kriza e strehimit në ishull është jashtë kontrollit dhe shumë të rinj janë të detyruar të jetojnë me prindërit e tyre për shkak të rritjes në qiell të qirave.

    Rritja e numrit të vizitorëve po intensifikon presionin mbi burimet e kufizuara nga klima: në disa zona të ishullit, në korrik u njoftuan edhe kufizimet për përdorimin e ujit.

    Rrugët e përmbytura nga makinat me qira janë të bllokuara dhe transporti publik nuk është në gjendje të mbajë numrin gjithnjë e në rritje të turistëve; Majorka, e cila ka një popullsi prej pak më pak se një milion banorë, përgatitet të presë rreth 20 milionë vizitorë këtë vit.

    Mallorca nuk është e vetmja në organizimin e protestave kundër turizmit të tepruar: mijëra njerëz nga e gjithë Spanja jugore zbritën në shesh në Malaga më 29 korrik, ndërsa UNESCO ka paralajmëruar kohët e fundit se kjo valë kundërshtimesh mund të përhapet në të gjithë Evropën.

    Këtë verë, ishte Barcelona në qendër të vëmendjes pasi protestuesit goditën turistët me pistoleta uji. Nëpër destinacionet që kanë tërhequr një numër në rritje vizitorësh pas pandemisë, ka nga ata që pyesin se si mund të arrihet një ekuilibër midis pritjes së vizitorëve – dhe vendeve të punës dhe të ardhurave që ata sjellin – dhe ruajtjes së vendeve për ata që jetojnë atje çdo ditë. Në qershor, Barcelona njoftoi se do të ndalojë marrjen me qira të apartamenteve për turistët deri më 2028, pas protestave nga vendasit.

    Por protesta nuk ka vetëm në Spanjë. Kështu, në kryeqytetin portugez, Lisbonë, një numër në rritje i turistëve po vë nën presion tregun e pronave. Që pas pandemisë, janë zhvendosur këtu ata që punojnë në distancë të tërhequr nga përfitime të tilla si viza nomade dixhitale e Portugalisë, e cila ofron një vit qëndrimi nëse demonstron të ardhura minimale prej 2,800 euro në muaj. Që atëherë Portugalia është goditur nga qiratë e larta dhe e ka kufizuar skemën e “vizave të arta”, e cila u ofronte të huajve mundësinë për të fituar shtetësinë duke blerë një pronë me vlerë të paktën 500,000 euro.

    Rasti “Italia”

    Edhe Italia nuk është imune ndaj këtij problemi. Pas pandemisë, u regjistruan rekorde prezencës në të gjitha qytetet më të mëdha dhe pas pak muajsh Roma përgatitet të presë jubileun. Prej kohësh, kundër invazionit të qendrës historike prej ambienteve argëtuese, paninotekave dhe minimarketeve, administrata e kryeqytetit po punon për një rregullore të re në mbrojtje të dyqaneve historike dhe bizneseve lokale për mbrojtjen e banorëve vendas.

    Në Firence, kreu i bashkisë ka propozuar dhe miratuar ndalimin e qirave afatshkurtra në zonën UNESCO të qytetit. Në Venecia, nga ky vit është vënë në qarkullim një biletë hyrjëse në lagunë në ditët “më të nxehta” dhe edhe në zonën e “Cinque Terre” po studiohen zgjidhje të tilla.

    “Unë nuk jam për ndalime absolute, duhet të rregullojmë dhe mos t’i kriminalizojmë qiratë afatshkurtra të cilat në shumë zona italiane, ku hotelet janë të pakta, qiratë afatshkurtra janë thelbësore për mirëpritjen e turistëve. Kjo është arsyeja pse si qeveri kemi futur normën Cin për të përmirësuar dhe menaxhuar fenomenin”. Kështu ka shpjeguar ministrja e Turizmit të Italisë, Daniela Santanchè, në një intervistë për Il Tirreno, duke përsëritur se angazhimi duhet të jetë çsezonalizimi i flukseve turistike dhe tërheqja e vizitorëve në destinacione të tjera më pak të njohura, por jo më pak të bukura.

    Përgatiti Dardan MITROVICA