Blog

  • Qesharakë deri në dhimbje, si Ulsiu dhe Elisa hahen dhëmb më dhëmb për turistët e Ramës (VIDEO)

    Qesharakë deri në dhimbje, si Ulsiu dhe Elisa hahen dhëmb më dhëmb për turistët e Ramës (VIDEO)

    Sa më shumë kohë kalojnë në pushtet, aq më e vështirë po bëhet për rilindasit që të ruajnë sensin e realitetit.

    Edhe më e rëndë peshon kjo sfidë për ata që nuk e kanë konstruktin mendor për të përballuar dehjen nga karrigja. Mes tyre është radhitur edhe Ulsi Manja të cilin jo më kot Lolita e ka kthyer personazh të faqes së saj.

    Ai është ngërthyer sot në një debat me kundërshtarët e vet demokratë, që po i bënin jehonë investigimit të RAI 3, që e akuzonte Edi Raman se ka ngritur një narko shtet. Pas e akuzoi Edmon Spahon se ai dhe PD paguanin RAI-n dhe BILD-in, Ulsi nxori nga goja perlën e rrallë: “Po si qenka Shqipëria narkoshtet, po të ishte e tillë, nuk do të vinin 10 milionë turistë në vit”.

    https://streamable.com/vaq6gy

    Megjithatë, kapaciteti fëmijënor i logjikimit të ministrit të drejtësisë, nuk është një virus që ka mbirë në tokë djerrë. Ai ka precedentë.

    Prej më shumë se një viti propoganda e regjimit i ka detyruar TV Kombëtare dhe mediat e vogla që ka nën kontroll të japin me detyrim çdo ditë kronika për sukseset e Shqipërisë turistike.

    Dhe ato, që me një batutë të spikatur lideri i opozitës Sali berisha i ka etiketuar si “teleturizmi”, e bëjnë me devotshmëri punën e tyre. Aq me zell sa spektatorë si Manja fillojnë i besojnë asaj që shohin në ekrane edhe pse e dinë që ajo është një propagandë e transmetuar me urdhër.

    Por, sado qesharake të duket logjika e Ulsit se këtu nuk ka mafie pasi kanë ardhur turistë, ai ende nuk e ka kapur vendin e parë në klasifikimin e debilizimit. Aty qëndron e palëvizur ministrja e shtetit Elisa Spiropali, që ia mveshi sukseset e Shqipërisë turistike, rolit të Skënderbeut të saj në betejat që zhvillon në arenën ndërkombëtare.

    Duke folur në kongresin e PS ajo nuk harroi të thoshte se rritja e numrit të turistëve ka ardhur edhe falë fjalimit të Edi Ramës në OKB, i cili i theu hundët ambasadorit rus në Këshillin e Sigurimit të Kombeve të Bashkuara.

    https://streamable.com/knw8l4

    Këtej e tutje nuk do të jetë çudi që të dëgjojmë edhe se inceneratorët po punojnë, pasi përndryshe nuk do të vinin turistë; se Veliaj, Molla dhe Qato nuk kanë vjedhur me 5D, pasi përndryshe Tirana nuk do kishte grupe me të huaj; se tokat e jugut nuk janë rrëmbyer, pasi po të kishte ndodhur mediat italiane dhe britanike nuk do lavdëronin brigjet e Jonit.

    Shpifje të tilla mund ti prodhojnë vetëm kazanë si RAI 3, që sipas Ulsiut, është i blerë nga PD-ja.

  • Nga Enver BYTYÇI – Berisha dhe Rama: Kush duhet hetuar e kush është nën hetim!

    Po bëhen gjashtë muaj që kur SPAK ka izoluar me arrest shtëpie kreun e opozitës, Sali Berisha. Prej asaj kohe e deri më sot prokurorët e kanë thirrur Doktorin vetëm njëherë për hetim! Thjesht i kanë komunikuar se “është nën hetim”, me dyshimin për korrupsion pasiv. Argumenti që kanë sjellë është krejt absurd. I korruptuari “aktiv” qenka dhëndërri i tij. Metodologjia e hetimit është gjithashtu absurde. Korrupsion për shkak të një ligji të parlamentit për kthimin e pronave!

    Por nuk dua të ndalem te kjo pjesë. Meqë Berisha është person në hetim, pse nuk hetohet? Kjo është pyetja! Prej gati gjashtë muajsh nuk u thirr në hetzuesinë e SPAK, përveçse njëherë. Gjatë kësaj kohe nuk ka asnjë zhvillim të ri në procesin anti-Berisha?! Nëse jo, atëherë pse mbahet nën hetim e nën arrest?! Nuk ka ndodhur kurrë që një person nën hetim të arrestohet! Nuk ndodh që drejtësia e pavarur të arrestojë një person qoftë të thjeshtë e pa asnjë funksion, pse është shpallur nën hetim. Kjo ishte praktika e hetuesisë së Aranit Çelës në kohën e diktaturës. Parimi i atëhershëm “ta fusim njëherë në burg e pastaj gjejmë provat”, po aplikohet sot te kreu i opozitës në Shqipëri. Dhe Altin Dumani mburret me këtë praktikë!

    Megjithatë, unë e kam një shpjegim. Prokurorët hetues janë të trembur e njëkohësisht të tredhur. Kanë frikë edhe të hypin në lis edhe të zbresin prej tij. Nëse e thërrasin Sali Berishën, nuk janë ata që bëjnë akuzë e as hetim. Eshtë Berisha ai që i ve përpara me akuza dhe prova e fakte për shkeljet e ligjit që këta prokurorë bëjnë në procesin kundër kryetarit të opozitës. Të paaftë të gjejnë prova dhe fakte, prokurorët e SPAK, me urdhër politik, as nuk e lirojnë Doktorin, as nuk e hetojnë atë. Duan thjesht të zbatojnë një praktikë për të cilën janë urdhëruar. Nuk ka ndodhur ky precedent kurrë në historinë e ndonjë demokracie në botë, sado e qullosur të ketë qenë ajo demokraci.

    Por në Shqipëri ndodh edhe kjo. Kryetari i opozitës mbahet në izolim pa akuzë. Thuhet se është nën hetim e nuk hetohet. Dhe e gjitha kjo thjesht për ta denigruar e shkatërruar opozitën shqiptare. Ishte Berisha ai që para një dekade e cilësoi qeverisjen e Rilindjes si narko-shtet. Sot kemi ardhur në momentin kur të gjithë skeptikët e asaj kohe e pohojnë me gojën plot këtë akuzë. Ndërsa drejtësia e SPAK, në vend të hetojë narco-shtetin dhe ideatorin e regjizorin e tij, kryeministrin e Shqipërisë, bën sikur heton ish-kryeministrin e ish-presidentin e Shqipërisë, pikërisht për faktin se ai i pari e me guximin e një “të marri” i dha emrin që ka kësaj qeveria e këtij shteti!

    Mos prisni që Sali Berisha të hetohet. As të thirret më në SPAK. As ta nxjerrin në ndonjë seancë gjyqësore. Nëse ndodh kjo, atëherë nuk i bëhet gjyqi Sali Berishës, por është ky i fundit që do ia bëjë gjyqin narco-shtetit dhe seksionit të tij me emrin SPAK. Gjithçka e krijuar dhe e financuar nga Soros, përfshirë SPAK-un, është pjesë e narco-shtetit. Kush ka iluzione, e nëse ky iluzionist i takon opozitës, këto iluzione t’i mbajë për veten e tij. Së paku mos pengoni rrëzimin e narko-shtetit!

  • Një lajthitje hileqare në fjalën e fundit të Ramës për investigimin e RAITRE

    Një lajthitje hileqare në fjalën e fundit të Ramës për investigimin e RAITRE

    Kryeministri i Shqipërisë, Edi Rama e konsideroi punën e gazetarëve të RAITRE pa asnjë vlerë juridike dhe pa asnjë bazë faktike, përkundrejt skandaleve që u raportuan në materialin e REPORT. Sipas Ramës, puna e gazetarëve italianë i ngjante një dosjeje të Sigurimit të shtetit, e ndërtuar mbi thashetheme dhe deklarata të paverifikuara.

    Rama mohoi dëshminë e Arben Ahmetajt, si “person i shpallur në kërkim ndërkombëtar”, sulmoi Sali Berishën për “arrestin e shtëpisë nga SPAK” dhe përgënjeshtroi Fatos Lubonjën si një “veteran në gjysëm të vërtetat kundër tij”. Vetë u mburr se i doli përballë pyetjeve të gazetarëve italianë dhe nuk iu fsheh ballafaqimit në një intervistë, që e transmetoi të pacensuruar.

    Gjithsesi në reagimin e Ramës, që mund ta lexoni të plotë më poshtë, ka edhe një hile, një truk, një manipulim që e përshkron kudo nëpër rreshta fjalën e tij. Ndërsa flet për materialin e REPORT, Rama tenton të ngacmojë qytetarët shqiptarë në komplekset e inferioritetit përballë të huajve, pasi akuzat për korrupsion që i vishen atij dhe qeverisë së tij, i kalon si “baltë” të hedhur drejt flamurit, kombit dhe çdo shqiptari.

    Nëpër rreshta, Rama përmend “baltën e pamerituar për Shqipërinë“, duke vazhduar se ata “janë mësuar ta na shohin e ta trajtojnë Shqipërinë si vend të botes së tretë, nuk na e falin dot suksesin, çlirimin nga hijet e të shkuarës, kokën e ngritur lart”.

    Ky njehsim që Rama i bën qeverisë së tij të korruptuar me flamurin dhe Shqipërinë ka dy shpjegime.

    I pari, që nuk duhet përjashtuar, është se Rama ka kaluar në delir. Ai tani e identifikon veten me Shqipërinë. Ky nuk do të ishte hera e parë që një autokrat hyn në këtë fazë (a)logjike. Rama po bën 24 vjet që mban një post shtetëror. Rrethi i servilëve dikur e krahasonte me Ismail Qemalin, ndërsa në mandatin e tretë, e krahasojnë me Skënderbeun.

    Shpjegimi i dytë e përjashton delirin, por bazohet tek manipulimi. Duke provokuar ndjenjën e racizmit, që shumë shqiptarë e kanë ndjerë në kurriz në vitet e emigracionit, Rama tenton ta zhbëjë imazhin e të korruptuarit dhe të bashkëpuntorit me krimin dhe të shpëtojë nga përgjegjësia për skandalet e qeverisë së tij.

    Në fakt, e kundërta është e vërtetë. Gazetari italian Xhorxhio Motola e theksoi disa herë në intervistën me Ramën, se nuk kishte asgjë me shqiptarët.

    Grupi i xhirimit të RAITRE nuk erdhi në Shqipëri për të hedhur baltë ndaj kombit shqiptar, por për të raportuar skandalet e qeverisë së Ramës. Në emision nuk u përmend asnjëherë flamuri shqiptar, nuk u përmend asnjëherë kombi shqiptar, apo nuk pati asgjë për historinë e Shqipërisë. Emisioni pati në qendër të vëmëndjes invstigimin e korrupsionit dhe lidhjet e krimit me njerëzit pranë Edi Ramës. Por ky dallim, zhduket me qëllim në reagimin e Ramës.


    REAGIMI I PLOTE I KRYEMINISTRIT RAMA PER EMISIONIN E REPORT

    Dëshiroj të ndaj me ju eksperiencën time me programin Report të RAI3. Një eksperience intensive, sa fyese në aspektin njerëzor, aq edhe sfiduese në aspektin, le të themi profesional, megjithëse politika për mua nuk është profesion, është mision.

    Ishte fyese sepse përtej personales, keqardhjes, dhimbjes nga padrejtësia e imponuar e vendosjes në shënjestër, për shkak të fushatës elektorale në Itali e të luftës mediatike atje, ndaj homologes sime në krye të qeverise italiane, kjo eksperiencë kishte ne përmbajtje shume baltë për Shqipërinë; baltë e prodhuar këtu, në Tirane, për luftën politike ndaj meje e qeverise sonë dhe këtë ju e dini të gjithë.

    Dhe e gjithë ajo baltë e eksportuar nga këtu në Itali dhe e ekspozuar në ekranin e Shërbimit Publik italian, me lloj-lloj emra shqiptarësh e me dyshime të pambështetura në fakte, pa asnjë interes për publikun italian, që as nuk di e as nuk i intereson kush është X-i e Y-ni në Shqipëri, ishte padyshim një baltë krejt e pamerituar mbi Shqipërinë dhe shqiptarët.

    Dëgjoni, Shqipëria s’është më ajo që ishte, kjo shihet kudo, flitet ngado, mirëpo disa që janë mësuar ta na shohin e ta trajtojnë Shqipërinë si vend të botes së tretë, nuk na e falin dot suksesin, çlirimin nga hijet e të shkuarës, kokën e ngritur lart. Prandaj dhe pesë kulla në Tiranë ju duken si 500 ngaqë as e kanë imagjinuar që Tirana do të bëhej kjo që vetëm sapo ka filluar të duket , se skanë parë gjë akoma. Dhe e vetmja mënyrë që gjejnë, me ndihmën e gojëve mos e themi të politikanëve pa atdhe e të papagajve të tyre pa skrupuj, është të hedhin baltë për të na pikturuar pacipërisht si mafiozë, trafikantë, kriminelë…

    Po për mua cenimi me gjysmë të vërteta i Shqipërisë në gjuhë të huaj, nga cilidoqoftë e sidomos nga vendet fqinje, ku jeton edhe pjesa më e madhe e shqiptarëve të Europës, është një sulm mbi emrin, mbi nderin, mbi flamurin tonë kombëtar, mbi çdo shqiptar dhe pikë. Kush e bën, duhet ta mësojë se koha kur shteti shqiptar, qeveria, kryeministri i Shqipërisë, rrinin si skutha që bënin te fortin me të dobëtit këtu brenda dhe te menderosurin para të huajve, ka vdekur.

    U habiten gazetarët e Reportit dhe e thanë që unë jo nuk i ika asnjë pyetjeje, po e kërkova vetë, publikisht ballafaqimin me ta. Thanë që këtë politikanët e tyre nuk e bëjnë dhe e quajtën madje kurajë të madhe, po ne fakt e imja s’është kurajë, është krenari për Shqipërinë dhe për emrin shqiptar.

    Shqiptarët e Italisë, Greqisë e kudo tjetër, nuk kanë për të qenë kurrë vetëm sa të jem unë këtu, përballë asnjë cenimi të emrit shqiptar. Kane vuajtur boll për ta ngritur kokën dhe as ata, as Shqipëria nuk e ulin më kokën.

    Ne e dimë më mirë se kushdo plagët, problemet, të metat e dobësitë që kemi dhe që i luftojmë përditë me to. Po kush hedh baltë mbi Shqipërinë e mbi shtetin shqiptar, duke na treguar edhe me gisht siç bënin dikur që s’u linin kusur shqiptarëve, duhet e do ta marrë kurdoherë përgjigjen tonë. Me punë patjetër po dhe me fjalë, sa herë që është nevoja. Me vepra dhe me krenari sa herë që ne flasim për Shqipërinë.

    Ata thanë që nuk e kishin me Shqipërinë e me popullin shqiptar. Po ama dëmin ia bënë Shqipërisë dhe shqiptarëve në sytë e të gjithë audiencës së tyre italiane dhe nëse nuk ishin nisur me këtë mendim, këtë bënë.

    Po me kë e kishin ata?

    Ata e kishin me qeverinë e tyre dhe deri këtu janë në të drejtën e tyre të shenjtë. Por ama kur pastaj fusin në valle edhe qeverinë tonë, duke marrë autobote me llum nga kanalet e ujërave të zeza politike e mediatike këtu në Tiranë, për të thënë se marrëveshja e qeverisë së Italisë me qeverinë e Shqipërisë është jo vetëm e keqe, po edhe është bërë me një narkoshtet, me një qeveri ku shumë anëtarë të saj na qenkan të dënuar dhe të lidhur me mafian, ata shkelin, jo vetëm mbi të vërtetën, po edhe mbi nderin e mbi dinjitetin tonë shtetëror dhe kombëtar.

    Bashkëpunimi me një grusht shqiptarësh që ju i njihni shumë mirë, s’kanë atdhe, s’kanë fe, s’kanë din e as iman, që jo nuk e bindin dot popullin këtu, megjithëse shajnë e shpifin ditë-natë prej vitesh të tëra, po vetëm humbasin e diskreditohen përditë në sytë e tij, RAI 3 dha dy shfaqje të neveritshme të një gjasme gazetarie investigative.

    U përdorën si heronj të këtyre shfaqjeve figura të errëta, një kriminel italian i dënuar 17 vjet nga drejtësia shqiptare për tërë të zezat, një i arratisur i shpallur në kërkim ndërkombëtar nga SPAK-u, një i mbyllur në arrest shtëpie nga gjykata speciale antikorrupsion, një i përjashtuar nga Vetingu në sistemin e drejtësisë. U mor edhe ndonjë opinionist, veteran i luftës me gjysmë të vërteta kundër meje e qeverisë sonë qysh se s’mbahet mend e ku di unë kush tjetër, ndërkohë që u trajtuan si personazhe negativë të shfaqjes, drri tek personalitete të politikës e të kulturës italiane apo lloj-lloj individësh të njohur e të panjohur në Shqipëri, duke hedhur baltë akuzash e dyshimesh, pa asnjë lloj fakti.

    Por në fund shfaqja që dukej si një çorbë tik-toku, qep, shqep e bashko fjalë e imazhe sipas skenarit, nuk tha asgjë të re përveç jashtënxjerrjeve të ujërave të zeza të politikës Non Grata e të kanaleve mediatike këtu në Shqipëri, që i shërbejnë asaj llum politike. Asgjë e pakontestueshme logjikisht, nuk kishte aty e lëre pastaj të vlefshme juridikisht, nga ky pseudo investigim italo-shqiptar, po vetëm u mbars mali dhe polli një mi, duke u justifikuar në fund se prova s’ka po ka akuza”!

    Akuza nga kush, mbi çfarë baze faktike, mbështetur mbi cilat të vërteta të provuara? Një shfaqje televizive si një version demokratik i hetimeve famëkëqija të Sigurimit të Shtetit, “ky tha, ai tha, ata thonë”, “ai takoi atë”, “ky u takua me atë”, “ti takove ata”, “thuhet se këtu bëhet kjo”, “thonë se në Shqipëri ndodhin këto”, “janë arrestuar, jo s’janë arrestuar”, “janë të lidhur, jo s’janë të lidhur”, “thanë dy kriminelë që njohin atë”, “ka akuza për vëllain e atij”, “ata atje pastrojnë paratë e atyre andej”, bla-bla-bla…

    Por tekefundit, te paktën ana italiane e këtij bashkëprodhimi te neveritshëm, e pohoi me gojën e vet se nuk janë ata që mendojnë se Shqipëria është një narkoshtet, nuk janë ata drejtpërdrejtë që akuzojnë, po janë të tjerë, janë këtu, në mesin tonë, ndërsa ata thjesht gatuan një çorbë me prodhime bio shqiptare.

    Tani unë nuk kam asgjë më shumë me palën italiane, me gazetarin italian jo e jo, ai erdhi më mori një intervistë, shërbeu dhe iku. Ua thashë në mes të Italisë që ditën e parë se çfarë ishte ai pseudo-investigimi i tyre, nuk lashë hapësirë e shteg në mediat e vendit mik pa ua përplasur syve të vërtetat dhe siç e patë, jo vetëm nuk iu shmanga ballafaqimit, po e postova të pacensuruar në këtë faqe. Sepse po të kisha gjëra për t’u shmangur apo pyetje për t’u sikletosur, nuk rrija në këmbë për të udhëhequr Shqipërinë, po ikja ulesha në bisht tek bahçja e shtëpisë.

    Unë e kam me të gjithë shqiptarët e zakonshëm dhe e kam të thjeshtë fare:

    Mos i falni më! Braktisini përgjithnjë në vetminë e ujërave të zeza të politikës së tyre. Shumica që i ka braktisur prej kohësh duhet të bëhet gati për t’i shkatërruar fare me votë në ditën e afërt të gjykimit popullor. Pakica që ende nuk i ka braktisur, është në të drejtën e Zotit të mos bashkohet me shumicën nëse nuk do, po jo të vejë më pas tyre, sepse ata nuk i duhen as dreqit, jo më Shqipërisë! Ata janë mishërimi i shpirtit të së keqes që po del nga jeta e Shqipërisë, duke u çjerrë në përpëlitjet e fundit. Ky vend ka kry punë me atë shpirt të keq që e persekuton qysh prej vitit 1912.

    Shqipërinë nuk e ndal më asgjë dhe nuk ia përcakton më të ardhmen askush, përveç nesh, shqiptarëve. Kokën lart dhe vetëm përpara!

  • Nga Nga Erion DASHO – ‘Ç’më duhet mua?’

    Nga Nga Erion DASHO – ‘Ç’më duhet mua?’

    Indiferenca! Indiferenca është sot armiku më i madh i shqiptarëve, sikundër ka qënë armiku i shumë demokracive në vite dhe shekuj.

    Nëse drejtorët në shtet u bëjnë presion vartësve duke i detyruar për cilin kandidat të votojnë, në cilin miting partie do të marrin pjesë, ky nuk është problemi im. Unë nuk punoj në shtet…

    Nëse patronazhisti në lagje e di se për kë votoj unë dhe gjen një mijë e një mënyra për të më bindur të votoj rilindjen dhe boratët, ky nuk është problemi im. Unë nuk kam interesa politikë…

    Nëse taksidari i qytetit merr listën e gjithë tregtarëve të vegjël që janë simpatizantë të “armikut” politik dhe i mbyt ata me kontrolle dhe gjoba, ky nuk është problemi im. Unë nuk kam biznes…

    Nëse gjyqtari ja nxin jetën mikut tim me gjyqin që vazhdon prej 10 vitesh, ky nuk është problemi im. Unë nuk kam gjyq të hapur…

    Nëse drejtori i hipotekës bashkë me të fortin e qytetit i vodhën tokën në bregdet fqinjit tim për t’ja shitur një “investitori strategjik”, ky nuk është problemi im. Unë nuk kam toka…

    Nëse kryetari i bashkisë vjedh taksat e mia duke ja dhënë ato investitorëve fantazmë, ortakëve dhe bashkëhajdutëve, ky nuk është problemi im. Për mua ka rëndësi që plehrat gjithsesi largohen nga kazanët…

    Nëse kompania e shokut tim falimentoi sepse tenderët jepen të gjithë me miq, me taraf e me ortakë, ky nuk është problemi im. Unë nuk kam kompani…

    ***

    Dhe vjen pastaj dita, kur ti je i survejuar, i spiunuar, i vjedhur, i shtypur, i përqeshur dhe i tallur. Kur ti nuk mund të kërkosh më të drejtën tënde.

    Sepse aty ku mbizotërojnë paligjshmëria, padrejtësia, dhuna dhe shtypja, ti kurrë nuk do ta gjesh të drejtën tënde kur të kesh nevojë.

    Sot ti bën indiferentin përballë padrejtësisë dhe shtypjes që i bëhet punonjësit të shtetit, mësuesit, tregtarit, pronarit, biznesmenit, kryetarit të opozitës, kurse nesër të tjerët do të bëjnë indiferentin kur ti të jesh viktimë e padrejtësisë dhe shtypjes së radhës.

    Sepse një shtet që bazohet tek padrejtësia dhe paligjshmëria nuk ndalet para asgjëje! Është vetëm çështje kohe deri sa të arrijë edhe tek ti!

    Fatkeqësia do të të godasë edhe ty herë a vonë sepse sot ti mendon, “Nuk është problemi im!”

    ***

    Shqiptar! Dil dhe protesto sot!

    Dil dhe kërko të vendosen para drejtësisë Borati, boratët dhe bashkëhajdutët e tyre! Dil dhe kërko të shkarkohet dhe të dërgohet para drejtësisë Lali i Boratit!

    Dil para se të jetë vonë! Di dhe kërko liri për kreun e opozitës! Dil dhe kërko qeveri teknike!

    Përndryshe do ta gjesh veten në vitin 2030, apo 2040 duke u qeverisur nga të njëjtët hajdutë, kriminelë dhe vandalë!

    Do ta shohësh veten tënde skllav…

    Askush nuk do të jetë pranë teje duke protestuar…

    Protestuesit do të kenë vdekur, ose do të jenë larg…

  • Nga Enton ABILEKAJ – Zemërimi i Edi Ramës

    Nga Enton ABILEKAJ – Zemërimi i Edi Ramës

    Në një mesazh më përçarës se kurrë, me një gjuhë urretjeje të hapur ndaj opozitës dhe çdo opozitari, Edi Rama vendosi të hakmerrej me të vërtetën që e mundi në zyrën e tij. Me argumente qesharakë, si ai që reportazhin e ka përgatitur dhe sponsorizuar opozita, kjo që ka vetëm një dritare në vend, por edhe me argumente të rrezikshëm si ai i një sulmi ngaj Shqipërisë prej grupimeve të huaja politike.

    Pa u bërë akoma 3 ditët e shenjta të harresës, Edi Rama doli sot me një autoregjistrim për të thënë ato që nuk i tha dot përballë gazetarit të Rai 3. Doli për të thënë çfarëdo varianti të ngjarjeve, pa asnjë filtër, pasi dështoi ta bënte këtë me filtrat e gazetarit që nuk kontrollohej prej tij. Doli, si për të thënë se, vërtet përballë mediave të lira ai del si krijuesi i një narkoshteti, por përballë kamerave të Kryeministrisë, që e shpërndajnë mesazhin në gjithë mediat sa dhe si do ai, del si udhëheqësi i suksesshëm i kombit, që ka bërë xheloze gjysmën e Italisë dhe po mban mbi supe pasojat.

    Në një mesazh më përçarës se kurrë, me një gjuhë urretjeje të hapur ndaj opozitës dhe çdo opozitari, Edi Rama vendosi të hakmerrej me të vërtetën që e mundi në zyrën e tij. Me argumente qesharakë, si ai që reportazhin e ka përgatitur dhe sponsorizuar opozita, kjo që ka vetëm një dritare në vend, por edhe me argumente të rrezikshëm si ai i një sulmi ngaj Shqipërisë prej grupimeve të huaja politike. Sado butaforikë dhe qesharakë, sado të pabesueshëm, Kryeministri i kapur gafil përpara qytetarëve shqiptarë dhe italianë, i hodhi në eter pa asnjë përgjegjësi, për të tentuar pa rezultat të rindërtojë alibinë e rrëzuar të Shqipërisë europiane.

    Ai u mundua të bindë se fajin nuk e ka ai që e bëri Shqipërinë narkoshtet, por ata që po e ekspozojnë kështu, se fajtor nuk është hajduti por ata që e kapin, se Shqipërinë nuk po e bastis dhe boshatis ai që e drejton, por ata që e tregojnë.

    Me sytë nga promteri, duke lexuar tek kamera tekstin e parapërgatitur, dukej sikur për herë të parë ai nuk i shikonte dot në sy shqiptarët, ata që po e merrnin mesazhin, e montuar me shpejtësi pas disa dublave. Dukej sikur as ai vetë nuk i besonte dot ato që kishte shkruar, ndërsa i shqiptonte me zë të lartë, as ai vetë nuk e besonte se fajin për Arben Ahmëtajn e ka Saliu dhe se rrëfimi i tij i pendesës është për të mos u besuar, megjithëse konfirmohet nga ngjarjet publike të 11 viteve në pushtet.

    Më shume se më opozitën, më shumë se me Ahmetajn dhe shumë më shumë se me Becchetin, zemërimi i tij duket se buron nga një dështim i madh. Jo dështimi i qeverisjes, dështimi i imazhit që investoi nëpërmjet qeverisjes. Sot po duket e qartë që nuk ishte nisur kurrë të ndryshonte vendin, ta bënte më të mirë dhe më të jetueshëm për qytetarët, ta bënte sa më europian dhe sa më shtet të së drejtës. Ai ishte nisur të bënte këtë që ka bërë, një narkoshtet që tani po tremb edhe Europën. Duke ndërtuar republikën e tij të bananeve, ndërtoi edhe një operacion marrëdhëniesh me publikun, një fushatë imazhi shumë të kushtueshme, që të reflektonte brenda dhe jashtë vendit, por sidomos jashtë, të kundërtën e realitetit.

    Ai nuk u nis të ndryshonte Shqipërinë, por të ndryshonte lajmet, u bë kryeministër që të bëhej kryeredaktor në të gjitha platformat mediatike dhe ia arriti shumë lehtë në Shqipëri. Tony Blair bashkë me Alistair Campbell, pastaj Jacques Attali, u bënë këshilltarët e tij me kontrata të dyshimta dhe jotransparente. Ndërkohë që një kryeministër të Italisë u mundua ta joshë me një koncesion që sot është në hetim nga SPAK, një ish-kryeministër si D’Alema, me shumë influencë tek e majta europiane, u bë “mentori” i tij që bënte biznes preferencial në Shqipëri, ministri në detyrë Alphonso Urso gjithashtu një filial biznesi i privilegjuar në Tiranë. Në 2017 korruptoi një nga zyrtarët më të lartë të FBI, ndërsa krijonte raporte personale dhe jotransparente me të gjithë liderët lindore dhe perëndimorë që tregoheshin të hapur.

    I gjithë ky investim, nuk e ndihmoi Shqipërinë të ecte në integrimin europian, përkundrazi, e la në vend për 10 vjet. Ky investim në miq personalë nuk e ndihmoi Shqipërinë të marrë më shumë projekte, madje u ndërpre dhe IPARD 2, për shkak të korrupsionit, nuk e ndihmoi Shqipërinë për investimet e huaja, përkundrazi i pakësoi, as për krijimin e një shteti ligjor, as për shtimin e vendeve të punës, as për rritjen ekonomike më shumë se 4 për qind.

    Ky investim ndihmoi vetëm Edi Ramën, që pavarësisht këtyre dështimeve të mëdha, pavarësisht shkatërrimit të zgjedhjeve, të ekonomisë, pavarësisht kanabizimit të vendit, të kishte mbështetjen perëndimore, të kishte të drejtën të rrinte në pushtet pa legiitimitet, duke vazhduar projektin e tij për republikën personale të bananeve.

    Këtë goditën rëndë 2 reportazhet e Rai3, këtë goditi rëndë edhe Bild në shkrimin e të hënës, këtë kështjellë po rrëzojnë tani ato media perëndimore që kanë kthyer kokën nga Shqipëria pa qëllimin për të marrë reklamën e “Maldiveve të Ballkanit”. Sa më shumë raportime të tilla, aq më shumë do ndryshojë opinioni publik në Europë, aq më të vështirë do ta kenë edhe figurat publike që Rama i ka mbledhur, që ta mbështesin, aq më i afërt do jetë fundi i fasadës perfekte që ka investuar.

  • Nga Luçiano BOÇI – Në vend të një pikture për narko-shtetin e kreun e tij

    Mafia ka evoluar me kohën dhe ka lënë pas brutalitetin fizik (jo se nuk është brutale) dhe ka rritur ndjeshëm brutalitetin ekonomik dhe atë politik. Ka ndërruar petk e lëkurë. Sot Mafia “angazhohet në fushata elektorale ku mbështet përfaqësuesit e vet dhe forcat politike që i dominon ose drejton, bën pastrim parash, posedon industrinë e mbetjeve dhe merr pozicione menaxheriale në kompani dhe qeveri. Mafia e dikurshme gjakatare dhe e pamëshirshme është shndërruar në një organizatë biznesi-politike që nuk qëllon më, nuk përdor bomba apo vetëm pazare droge, por që dëshiron të ushtrojë megjithatë pushtetin në vend të shtetit”.

    I gjithë ky parashtrim duket sikur është bërë enkas për Qeverinë Rama. Realisht i referohet Cosa Nostra-s. Ngjashmëria është kaq “pikë-uji” sa është e vështirë të dallosh ku fillon Mafia dhe ku mbaron qeveria Rama. Më saktë narko-shteti Rama.

    Të gjitha aktivitetet e lartpërmendura janë ekskluzivitet i një qeverie pa personalitete brenda saj, por me një kapobandë Kryeministër, i cili sot dirigjon dhe rakordon me organizatën narko-politike, sipas vetë ish zëvendësit të tij në arrati, por dhe asaj që dihet anë e mbanë, veprimtarinë e narko-shtetit me ekzotik të Evropës.

    Edhe ky vetë si organizata, ka ndërruar stil. Rama nuk është më ai “legeni” i dikurshëm i fillimviteve pas 2013, i lokalit tek “Coin” që e merrnin në telefonon “Ata” që i kishin dhënë karriken dhe i kërkonin të ndërmjetësonte uljen e gjobave që organizatat kriminale i vendosnin njëra-tjetrës, apo bizneseve. Ka evoluar si vetë organizata. Sot gjithçka e drejton nga Olimpi i zyrës të shndërruar në fletore vizatimi. Aty pret përfaqësitë e karteleve, bën tryezat zgjedhore e ndan territore. Jep liçenca dhe emëron investitorë strategjikë. Jep koncesione plehrash e sterilizimesh. Rregullon raportet e ul gjakrat e gjaqeve dhe laqeve. Hap portet për tonelatat e drogës ameriko-latine e ndërton kampe internimi refugjatësh. Shkel të dy sytë për pastrimin e parave të korrupsionit qeveritar e të narko-trafikut. Shkel ndonjë sy dhe për ato që duhen hequr qafe nën moton publike, gjoja “të hanë kokat e njëri tjetrit’.

    Madje tani flet ngadalë si me bezdi në shenjë pushteti dhe në emër të atributit si kapo. E kur vjen tek sulmi ndaj atyre që i nxjerrin të vërtetën e i prekin interesin, shpërfytyron gjuhën e mimikën, nxjerr në pah urrejtjen për botën e psikikën e deformuar.

    Herë pas here ligjëron dhe me pak mekje ose ofshe si një i vjetër që e imagjinon veten të ri dhe përpiqet të identifikohet me Ismail beun e Vlorës.

    Dikur zari i tavolinave sot është shndërruar në gjylen e tavolinave, njeriun me peshë që peshon fate parash, aferash, biznesesh e njerëzish.

    Kjo në sajë të shërbimeve që kartelet e drogës i japin gjatë fushatave të fituara zgjedhore.

    E rrethoi veten me këshilltarë evropianë ish-kryeministra për të korruptuar opinionin e larë pamjen e vet. Korruptoi agjentë amerikanë e shqiptarë për hesapet e karrierës se vet dhe luftës ndaj opozitës.

    Ndërsa për kapriçiot kokëçarëse e për shërbimet e votave kundrejt favoreve, ka emëruar de facto një përfaqësues për çdo sektor apo territor, të cilët i quan dhe koordinatorë politikë ose koordinatorë specialë.

    Fiks sipas modelit të strukturë së mafias, për të cilën SPAK-u i tij ka dijeni por njëherazi është i lumtur që ka dijeni.

    Po aty tek ajo fletorja e vizatimit pret miqtë e tij ndërkombëtarë, të cilëve u vetëofrohet me lëpirje e përqafime sektesh e insektesh e kërkon të bëjë “të madhin” e gjatë me duart e gjata të hajdutit tipik, të cilat dukshëm në shpropocion me trupin, mundohet t’i fshehë.

    Me këmbët e shkurtëra si vetë gënjeshtra, në raport me staturën e bustin; dobësi që e mbulon me xhaketat e gjata dhe këmishat e lëshuara, ecën me një siklet të mirëdalluar në qilimet që i shtrojnë për hir të shtetit dhe jo për hir personal.

    Bën gjithçka të bjerë në sy e t’i çjerrë sytë kombit të vet.

    Hyn në pazare e bën pazare për fatin e vet politik me çfarëdolloj çmimi e kostoje. Shet ç’të ketë përpara e fal gjithçka për të çimentuar narko-diktaturën.

    E ndërkombëtarët qeshin e gazmenden me të, me demokracinë teorike e qeshin me hidhërimin e njerëzve që largohen nga ky vend çdo ditë e më shumë.

    Romuzaxhiu i dikurshëm me profesionin gallataxhi i tavolinave tiranase kontroverse të ‘90, sot e përdor aftësinë e tij oratorike për të mashtruar sheshit, për të bërë e blerë sheshit propagandë e media e për të dalë shesheve si krenaristi i narko-shtetit.

    Ndërsa kompleksin e tij të inferioritetit e përshfaq në dëshirën perverse për të eleminuar me çdo kusht kundërshtarin e tij politik.

    Narko-shteti ndërkohë ecën sahat. Ka futur në bigë e thes ndërkombëtarët e tradhëtarët, analistët e specialistët, mediat dhe institucionet, politikanët e përtej detit dhe arlekinët e këtushëm.

    Kontrollon drejtësinë, tallet me bujqësinë, ka kriminalizuar ekonominë, ka vrarë shëndetësinë e ka rrënuar përdhunshëm arsimin.

    Ky narko-shtet objekt turistik, ka dhe një gjë krejt origjinale.

    Këtu njerëzit publikisht e mediatikisht shfaqen të lumtur dhe krenarë.

    Në tavolina, shtëpi dhe kufi janë të mërzitur dhe të prekur në dinjitet.

    Ndoshta po presin që Narkosi i rradhës t’i transmetojé artistikisht të vërtetën dhe të duhurën në sy, sepse opozita e të vërtetat e saj të faktuara ende nuk po ia mbushin syrin se kështu i flet në vesh propaganda, i ulëret frika e instaluar dhe i çorienton drejtësia e vonuar.

    E atëhere do jetë vonë.

    Prandaj kjo tablo e këtij Narko-shteti duhet grisur e djegur sa më parë.

  • Nga Basir ÇOLLAKU – Socialistë, për të shpëtuar Partinë duhet të ‘asgjësoni’ Ramën

    Nga Basir ÇOLLAKU – Socialistë, për të shpëtuar Partinë duhet të ‘asgjësoni’ Ramën

    Rama ka të drejtë ndaj RAI 3 e Bild, nuk jemi narko-shtet, jemi vetëm NARKO.

    Socialistë për të shpëtuar Partinë duhet të “asgjësoni” Ramën. Do ju bëjë kashtë e koqe kur të nisë rrokullisjen.

    Giorgio Mottola gazetarin e Rai 3, pregatitës i episodit Report për Shqipërinë, më qëlloi ta takoj në Tiranë, e në tel kam komunikuar disa herë. Ai bëri një punë të shkëlqyer. Profesionist dinjitoz.

    Belaja ka mbuluar Ramën dhe taborrin e tij

    Nuk e mbulon dot Edi. As e ndalon dot. Thjesht e ke nisur. Si mos më keq nga dalldia. Në kulmin e pushtimit do të pusho-pushtohesh.

    Lëre se do të të marrë përpara.

    Ti e di janë të tjerë në rradhë për rrëfimin e bëmave të tua të paligjshme. U ke çarë dërrasat tej parashikimeve edhe atyre se shqiptarët nuk i ke hesap. Kullohesh fjalësh për flamurin kombëtar.

    Ti turpëruesi i parë, që e këmbeve me flamurin e hashashit, drogës e vrasjeve, korrupsionit, mafias, e mijëra mjerimesh të tjera.

    Rama po del më tepër për të vonuar SPAK në veprimet e pritshme dhe të domosdoshme. Ai e di se ka pamje video. E di sa ka materiale dërrmuese. E di e shpreson bosh.

    Ti nuk zhbën dot Agron Geron Xhafën të dënuar me 7,2 vite për trafik ndërkombëtar në Itali dhe vëlla Fatmirin ke bërë gati për Komisionin e Posaçëm. Të dy duhet të hetohen sërish

    Nuk zhbëre dot as Tahirin, por e shite në fund.

    Ti nuk e zhbën telashin e pashmangshëm vëlla Olsin. Atë që gjermanët e zunë si daci në kos në dosjen e Laboratorit të kokainës së “Xibrakës” në 2014 dhe e kanë rikthyer. Hallakatesh të heshtësh daljen e fotove të vëlla Olsit, të përgjimeve të vëlla Olsit, me banditë kokaine.

    T’i kanë vënë në tavolinë Gjermanët njëherë. Ata do të t’i rivënë prapë. Nuk i fsheh përfshirjet e vëlla Olsit në biznesin e call centerave e spanjollë e gjermanë kanë qenë kallzues në SPAK. Nuk e fsheh vëlla Olsin në shumë punë ku delegim je vetë.

    Nuk e ditka zotëria se Artur Shehu është një hostori trafiku droge?

    Nuk i ka thënë Agaçi ku u bë rekomandues për ti dhuruar 30 mijë metër katror ish klientëve të tij, çuditërisht 19 ditë pasi u regjistruan mbi 200 hektarë tokë me kusure letrash jo origjinale!!

    Çalojnë shumë barcoleta. Nuk të ka thënë Taulanti i brendshëm se Artur Shehu është një ndër drejtuesit e bandës së procesit “Shqiponja e zezë” në Belgjikë aktualisht.?!

    Apo ai e ka mendjen te Sueli e shpërthimet e procesit të tij?! Nuk ke dijeni për atë orën 400 mijë euroshe. Nuk ke dijeni për avionin çartër me pesë qeveritarë të rëndësishëm që përfunduan në Aruba te Arturi?!

    Nuk e di ai kush është Sinaloa që e pret në zyrë të akuzuarin për lidhje me to?

    Dhe në investimin Kushner në Zvërnec do kuvendosh prapë me Arturin se historia e pronave andej është e paqëruar ende.

    Me Agasin zëvëndësove Dakon?! Ai bëri burg për vete e për ty. Gjynah. Kordinatori dhe grupet e Durrësit kishin superakses në KPK dhe sidomos në KPA.

    Kanë hequr e vënë kë kanë dashur. Beni të dekonspiroi sërish dhe lajmëroi. Miqësitë e Edit me Ymer Lalën nuk janë sekrete. Falë jush Dibra nxori 4 mijë çamë, një kurs historik befasues. Morët mandat bashkie e deputeti, por solli ters punët Luftar Reçi, kur akuzoi edhe Ymerin e SPAK për porosi vrasje. Nisën hetimet por dëshmia është një komedi e SPAK. Nga 22 pyetje asnjëra nuk lidhet me akuzën.

    Në Elbasan Beni ta ngau llafin për Suelin, njohjet e Taos. Një i super i kërkuar i patrazuar. E kap Balla mbase, po ka frikë se kap veten ndokund. Agasin e di se e ke saju vetë. Të fortët në mbledhje në godinën e qeverisë solli dëshmi zëvëndëskryeministri Ahmetaj. Me dëshminë e Nuredin Dumanit u arrestaun një dyzinë të akuzuarish.

    Për Ahmetajn kew puna. Duhet ta thellosh kujdesin. Zëra seriozë ka se te sky e sidomos encro është më shumë se gjysma e qeverisë. Mbi 70 aparatura nusëronin në godinën e KM. Dikush një e dikush dy aparatura, por udhëheqja nuk del e shkrehur. Bashkiakun Velo, kot e mba varur, hidhe mbaro punë se ke jo pak të tuat. Charlees e mbylle përkohësisht por litari është jashtë.

    Ua ke valuar lejeve me ngut këto javë. Kudo në Shqipëri. Janë shumë diplomatë dhe ish, kafshues të pasurive tona për të mbajtur fundshpinën tënde në pushtet.

    Giorgia, Massimo, Toni, Ursa, Vlahutin, Lu e Kim, Soreca, senatorë e kongresmenë agjentë e spiunë, rusë amerikanë e kinezë. Mbajua premtimet ortakëve, se Ndrangheta, Cosa Nostra, Camorra, e kanë pijen e keqe, me shumë sherr breshërish. Bitcoin, diamante apo pllaka ari, adresat e plaçkitjeve genocid nuk janë kurrë anonime.

    SPAK do detyrojë veten të shkundet e të të shkundë. Mos i lodh sejmenët mediatikë se ua nxorë për hundësh honorar-pazaret.

    Ata që i ke bërë biznesmenë gazetash e televizionesh me dorën tënde, do të të qëllojnë në përkundjen e parë…Të tjerat i di si vijnë..Ishin grekët, italianët, gjermanët, anglo-amerikanët..

  • Nga Alfred LELA – Gjergji i RAI3 dhe Skënderbeu i ‘elisëve’

    Nga Alfred LELA – Gjergji i RAI3 dhe Skënderbeu i ‘elisëve’

    Reportazhi investigativ i Rai3 i ka kthyer edhe njëherë pasqyrat mbi qeverinë dhe veprimtaritë e saj. Siç ka kthyer në panelet televizive një shpurë speciale debatuesish për të cilët ngjyra 11 vjeçare e Rilindjes është roza e përjetshme e mrekullisë e cila, madje, mund të kërrehej me të kuqen e gjakut në sfondin e flamurit kombëtar.

    Panelistët pro qeverisë janë si panelet diellore: ato nuk i përmbushin nevojat për energji, por e bëjnë Ramën dhe grupin e tij të mbajë ndezur kandilin e normalitetit kur çdo gjë përreth duket anormale.

    Kaq të përshtatur janë me absurdin, sa e lexonin dhe paraqisnin si anormal reportazhin e Rai-t, një angazhim gazetaresk disa mujor, jo një bisedë në studio, dhe për më shumë një ilustrim i asaj që quhet ‘gazetari interpretative’ dhe që siguron, për një publik të drobitur nga bombardimi me informacion të përminutshëm, atë që mund të quhet ‘pikat mbi i’.

    Janë këto pika që kanë rënë mbi të mbjellat e Rilindjes dhe kanë prishur jo vetëm hashashin, kullat, mrekullinë turistike, por sidomos ‘globalizmin’ e liderit socialist, i cili demaskohet nga gazetarët italianë si asgjë më shumë se shitje e Shqipërisë, territor që i paguhet ‘prurësit më të parë’.

    Vargani i të gjitha ngjyrave nga McGonigal te gjeneral Lisi, familja Bler, Massimo D’Alema e më këtej te të dyshuarit për narkotrafik apo ‘investitorët strategjikë’, janë një kujtesë e frikshme e frazës rilindëse ‘duam partinë më shumë se Shqipërinë’. Partia në këtë rast është organizata që lejon pasurimin individual dhe të grupit në kurriz të të tjerëve dhe Shqipërisë.

    Përpjekja parodike për ta shmangur problemin, si nga qeveritarët ashtu dhe nga emërimet e tyre në panele dhe në shtyp, ngjan paradoksal, por nuk është i tillë.

    Është instinkti i gjithkujt që, edhe kur e kupton se është në rrugë pa krye, nuk kthehet mbrapa por vijon. Të vijuarit është reagimi psikologjik i të humburit por edhe i davasë së humbur.

    Asgjë s’e shpjegon këtë më mirë se episodi i kryeministrit me gazetarin Giorgio Motola. Një burrë te 2 metrat dukej më i shkurtër se një tjetër 1.70m.

    Është hija që lëshon gjithkush trupi i të cilit rri mirë apo keq brenda lëkurës së vet.

    Fërgëllimat që lëshonte Rama fizikisht ishin shenja parehatie dhe se hija e tij ishte rritur më shumë se duhet në territoret e së keqes.

    Gazetari italian ishte pasqyra ku reflektohej kjo e vërtetë.

    Faqja e kornizuar e gazetës Koha Jonë, me një ish-Edi të buhavitur nga dhuna, mbi të cilën iu qa Mottola-s, është kujtesa se Rama aktual kërkon ta shpjegojë ngjitjen e tij si shpërblim për dhunën e pësuar, por don të shmangë dhimbjen se dhuna që ka shkaktuar do të çojë edhe në rënie.

    Psikologjikisht, fraza ‘nuk keni parë gjë akoma’ është shpagimi i tij për Edin e humbur të së dikurshmes që jeton thellë në atë foto të së shkuarës.

    Fotografia si ‘gazetar’ e një kryeministri kaq të ekspozuar në marshe anti-gazetareske nuk shërben. E shumta shpjegon atë se Rama e sheh atdheun si ekspozitor gjigand të cilin e pikturon dhe e shet.

    Një ikonoklast që shet ikona është megjithëmend një hata psikologjike.

  • Nga Andi BUSHATI – Rai 3 na tregoi sa paguajnë banditët për makiazh

    Edhe ata që nuk e duan Edi Ramën me siguri që kanë ndierë keqardhje për të, pas asaj që panë të dielën në mbrëmje. Në një intervistë ishin mbledhur të gjitha: tentativa e shkuar dëm për ta përqafuar dhe joshur një gazetar që e pati akuzuar si shpifës, pastaj kafja e refuzuar prej tij, më pas përcjelljet e mundimshme të pështymës kur kërkonte alibi bindëse ndaj fakteve kokëforta, me të cilat e përballi Giorgio Mottola. Padyshim që shfaqja në Report, të RAI 3, është një nga paraqitjet më të mjeruehme televizive të një kryeministri që mardhënien me median nuk e ka pikën e tij më të dobët.

    Edi Rama nuk gjeti dot asnjë justifikim bindës ndaj akuzave të rënda të Arben Ahmetajt, një prej njerëzve të tij më të afërt, të cilit i dha poste të larta në qeveri gjatë një dekade. Ai u shfaq gati qesharak, me alibitë për takimin në zyrën e tij, me një të dyshuar si pastrues të parave të kartelit të Sinaloas. Ai dredhoi shëmtuar kur gazetari e pyeti nëse Ergys Agaçi është pikëlidhja e tij me botën kriminale. Ai bëri gafë kur tentoi, që për të mbrojtur Engjëllin që mban në paradhomë, përfundoi duke amnistuar Artur Shehun.

    Ishte e vajtueshme të shihje shefin e qeverisë, tek rekej të argumentonte se kullat e Tiranës nuk po ndërtohen me paratë e krimit, përballë llogarisë me shifra zyrtare që kishte nxjerrë investigimi i Rai 3. Po ashtu, nuk ishte aspak efikase përpjekja për tu fshehur pas Melonit, sepse bashkëbiseduesi i tij ia përplasi në fytyrë: nëse kryeministrja e Italisë takohet me njerëzit e karteleve meksikane, unë do ti bëja të njëjtat pyetje.

    Në këtë emision, që i ka nxjerrë si karagjozë shume nga intervistuesit shqiptarë të Ramës, për gjatë një ore, ne pamë radiografinë e një narko shteti dhe fytyrën e vërtetë të atij që i prin. Por sa do të rënda të qenë denoncimet e ish zv/kryeministrit, sado denoncuese lidhjet e njerëzve të afërt të tij me krimin, sado të thelluara rrënjët që të shpinin në zemër të së keqes, ato nuk përbënin anën më interesante të asaj që shpërfaqi Report. 

    Ka një pjesë të errët tek e cila mediat tona po ndalen shumë pak. Ajo nuk ka të bëjë me profinin e një qeverisjeje të kriminalizuar, por me mënyrën se si ajo bën makizzh për të fshehur fytyrën e vërtetë. Andej nga fundi i emisionit, personazhe të tij u bënë edhe ish kryeministri italian D’Alema dhe ministri aktual i “Made in Italy”, Adolfo Urso. Ajo që e bashkonte këtë lider historik të post komunistëve italianë me eksponentin e sotëm të qeverisë të së djathtës qe vetëm një. Ata kanë hapur filiale të kompanive të tyre të lobimit në Tiranë. Pse? Sepse ndoshta këtu ka më tepër para që fitohen lehtë, sesa në bregun përballë të Adriaktikut. Dhe kjo është me sa duket arsyeja që Massimo D’Alema është parë shpesh në TV e vendit të vet duke mburur Edi Ramën. Të njëjtat arsye mund ta kene shtyrë Usrson të tradhëtonte partnerin e dikurshëm Becchetti, për tu lidhur me shefin tonë të qeverisë.

    Historia përsëritet njësoj si në rastin McGonigal. Ashtu si Toni Bler, që “punon falas”, ndërkohë që studioja avokatore e bashkëshortes së tij paguhet nga qeveria shqiptare, edhe në Itali do ketë mbërritur fjala se në narkoshtetin e rilindjes është bërë deti kos.

    Ky është në fakt një nga konkluzionet më të rëndësishme të investigimit të RAI 3, ekzistenca e një rrjeti ndërkombëtar që merret me kurimin e imazhit të një çete banditësh në Tiranë. Ne i dimë bëmat e saj dhe pjesa dërrmuese e gjërave që u thanë në emision i kishim të dëgjuara. Por ajo që shumë shqiptarë pyesin me habi është se si ka mundësi që kjo kleptokraci ka mbështetje të fortë perendimore. Report na e dha një pjesë të përgjigjes. Ajo nuk gjendet vetëm në qokat personale, si ato të kampeve të refugjatëve që Rama bëri për Melonin. Ajo duhet kërkuar në shndërrimin e vendit në një minierë ari, për ndërkombëtarët që pastrojnë imazhin e tij në perëndim. Një pjesë e parave të trafiqeve dhe korrupsionit tonë po majmin ish qeveritarë dhe politikanë që shpërblehen për të bërë propagandë në Evropë, ndonës jehona e fjalëve të tyre të peshuara me ar, zhurmon dhe në mjedisin tonë.

  • “Report”, të gjitha faktet që akuzojnë Edi Ramën

    “Report”, të gjitha faktet që akuzojnë Edi Ramën

    Emisioni Report në RAI 3 ka bërë një radiografi shteruese të narkoshtetit shqiptar e cila mori vlerë më të madhe edhe sepse gazetari Giorgio Mottola e vuri kryeministrin Rama të përgjigjej për të gjitha akuzat që rëndojnë mbi të dhe shtetin e tij…

    Emisioni Report në RAI 3 ka bërë një radiografi shteruese të narkoshtetit shqiptar e cila mori vlerë më të madhe edhe sepse gazetari Giorgio Mottola e vuri kryeministrin Rama të përgjigjej për të gjitha akuzat që rëndojnë mbi të dhe shtetin e tij. Ai e përballi me fjalët që thoshte ish zv kryeministri Arben Ahmetaj, i ngriti problemin e parave të pista që pastrohen në kullat e Tiranës, e pyeti për atë që u konsiderua si njeriu që mban lidhjet me grupet mafioze, Ergys Agasin, i vuri përballë takimet me Luftar Hysin, që dyshohet se pastron paratë e kartelit të Sinaloas. Por duke qenë se emisioni i drejtohej publikut italian ai u ndal fort edhe tek dy personazhe, ish kryeministri Massimo D Alema dhe ministri aktual i ndërmarrjeve Adolfo Urso që e kanë gjetur Shqipërinë aq tërheqëse, sa kanë ngritur në Tiranë kompanitë e tyre të lobimit.

    Kjo autopsi e vdekjes së shtetit demokratik të së drejtës që mori shkas pas forcimit të marëdhënies Rama Meloni, pati disa pika kulmore të cilat Lapsi.al i ka analizuar njëra pas tjetrës.

    Akuzat e Arben Ahmetajt

    Arben Ahmetaj pretendoi në një intervistë me kamer të fshehtë se Rama mban lidhje të forta me krimin e organizuar. Ish-ministri u shpreh se grupet kriminale përmes ndërtimit pastrojnë paratë e tyre në Shqipëri.

    “Grupet kriminale marrin tenderë nëpërmjet përfaqësuesve të tyre. Është e ditur kjo në Shqipëri. Ndërtojnë, pastrojnë paratë e tyre në ndërtim në Shqipëri. Praktikisht shesin drogë në të gjithë Europën dhe pastaj i kalojnë në Shqipëri. Ka në fakt një koordinim mes organizatave mafioze. Ata nuk vriten me njëri – tjetrin. Kjo sepse Edi Rama iu ka kërkuar të mos i hapin telashe. A është Rama i lidhur me këto grupe kriminale? Nuk është vetëm i lidhur, por po të jap emrin e koordinatorit, Ergys Agasi. Është një tip që jeton në Durrës, pranë klanit të Durrësit. Tani është bërë për llogari të Ramës, koordinator i të gjithë grupeve” – tha Ahmetaj.
    Ahmetaj është shprehur gjatë reportazhit në “Report” se kishte parë që kryeministri ka takuar figura drejtuese të krimit në zyrën e tij. Rama i mohoi këto akuza kur u intervistua dhe tha se i takon atij që akuzon të nxjerrë prova dhe jo atij që akuzohet. Ai e anashkaloi njërin prej ish bashkëpunëtorëve të tëij kryesorë me shprehjen “Pyll pa derra nuk ka”.

    Personazhi Enigmatik i lidhjes me bandat, Ergys Agasi

    Pas akuzave të ish zvendës kryeministrit se ai është njeriu që mban lidhjet e Ramës me bandat, Rai 3 theksoi se Ergys Agasi është një biznesmen nga Durrësi, djali i një ish-deputeti socialist, Bardh Agasi, përveç të tjerash pronar i një kompanie që prodhon cigare dhe që merret me logjistikë. Nuk ka qenë kurrë i dënuar apo i hetuar për lidhje me mafian shqiptare, por shpesh mediat kanë folur për lidhje të tij me anëtarë të grupeve kriminale si për shembull narkotrafikantin Xhevdet Troplini. Kur u pyet për të Rama nuk pranoi të përgjigjet dhe i rëshkiti interesimit të gazetarit duke i thënë se po fliste për emra që nuk kishin lidhje me të.

    Rasti i Luftar Hysajt

    Një tjëtër kazus si provë se Rama i priste narkotrafikantët në zyrë ka qenë edhe rasti i një personazhi të akuzuar se pastronte në Kanada paratë e kartelit të Sinaloas. Gazetari e ka pyetur Ramën për Luftar Hysën, një emër që më pas është konsideruar si një nga narko-trafikantët e Amerikës Latine. Rama tha e ka takuar në zyrën tij një herë, por nuk e dinte se kush ishte.

    “Unë as që e di kush është, në rregull? Nuk e di as kush është. Kam takuar njerëz, e përsëris, shumë njerëz, shqiptarë që ikin e vijnë, që duan të takohen, të shohin, me miq e me të tjerë. U thuhet, “në rregull, ejani, çfarë do bëni, si do e bëni”, etj. Megjithatë, fakti që një person edhe në qeveri apo një person që vjen nga jashtë, del nesër që është i kalbur nuk më bën mua përgjegjës që e kam takuar atë apo kam takuar dikë tjetër. Pra, kjo është mënyra sesi bëhet një gazetari që bën pis, që bën pis”iu hakërrua kryeministri Mottolës. Ai vazhdoi:

    “Unë nuk kam takuar asnjë pastrues të asnjë lloj paraje të asnjë pale. Unë jam takuar me shqiptarë, të cilët kanë ardhur tek unë, më kanë thënë që kishin synim të zhvillonin diçka dhe iu kam thënë: “Bëni si të doni, ligji dhe rrugët janë të qarta”. Dhe nuk me duket që ndokush të ketë përftuar ndonjë gjë si favor. Pastaj, nëse del se dikush është i bërë pis, atëherë, këtu ka ligje. Është sekuestrimi, është një gjë a një tjetër”. Por më pas asnjë masë nuk u morr ndaj Hysajt.

    Mbrojta e Artur Shehut në emër të Engjëll Agacit

    Rama u vu përballë edhe faktit se gjenerali i karabinierëve, Fabrizio Lisi, i cili ka mbajtur edhe postin e shefit të Interpolit Italian në Shqipëri në vitet 2014-2015, u gjend në mes të një skandali të madh, kur u zbulua se një fondacion i drejtuar prej tij në vendin tonë kishte marrë një dhuratë të vyer, rreth 30 mijë metra katrorë tokë në bregun e Vlorës, nga një i dyshuar si narko-trafikant, Artur Shehu.

    Në dëshminë e dhënë për emisionin “Report” gjeneral Lisi u pyet për mënyrën se si fondacioni “Luca dhe Marco Eftimiadhi” përfitoi tokën nga Shehu dhe ai tha se këtë të fundit ia kishte prezantuar Engjëll Agaçi, Sekretari i Përgjithshëm i Këshillit të Ministrave. Rama mori nën mbrojtje Engjëll Agaçin dhe Artur Shehun, teksa për këtë të fundit tha se nuk rezulton i dënuar, ndërsa mohoi edhe se ka njohje personale me të. Duke e mbrojtur Shehun si të pa dënuar ndonëse gazetari theksoi se ai ishte i hetuar në Itali, Rama donte ti bëhej mburojë Sekretarit të vet të Përgjithshëm:

    “Ai kishte një prokurë nga gjykata për të ushtruar detyrën e vet si avokat në itali, që nuk e ushtroi më kur u bë Sekretar i Përgjithshëm. Ç’hyn ai me këtë historinë e gjeneralit këtu, gjeneralit atje. Ç’lidhje ka? Pse keni vënë në mes një avokat, i cili nuk ka lidhje kurrkund me gjithë pjesën tjetër të historisë, që as nuk e njoh dhe as nuk më intereson. Sepse donit të provonit – dhe prapë doni ta bëni, e shoh, e parafytyroj tani edhe serinë e re – doni të vazhdoni të provoni që Xhorxha Meloni ka bërë një marrëveshje të gabuar me një qeveri plot hije. Dhe kjo është e turpshme” tha kryeministri!

    Kullat e drogës

    Narratori i emisionit përmendi si një temë të nxehtë paratë e drogës që pastrohen përmes ndërtimit në Tiranë. Sipas denoncimeve të Ahmetajt, pyetjes që ngriti Fatos Lubonja dhe shifrave të pa kundërshtueshme që renditi Ola Xama, disa prej “qiellgërvishtësve” që po ndërtohen në kryeytet janë me para të pista. Mes njërës prej të përmendurave ishte dhe kulla “Ekspozita” që po ndërtohet në zonen e ish-ekspozitës nga familjarët e Ervin Matës, të shpallur në kërkim për trafik droge. Gazetari italian theksoi se vetëm 20% e vlerës së përgjithshme të parave për ndërtimin e kullave është dhënë në formë kredie nga bankat. Pra nga 3.7 miliardë euro të investuara në ndërtim vetëm 846 milionë janë financuar nga sistemi bankar. Rama u rek të argumentojë se apartamentet shiten si pasojë e parave të emigracionit por edhe kjo shifër u hodh poshtë nga sasia e remitancave që raporton banka e Shqipërisë. Si për ta nxjerrë Ramën në gëneshtër kamera e Report tregoi kullat natën me drita të fikura dhe apartamente të pashitura.