Blog

  • Nga Oerd BYLYKBASHI – Që të mos çmendemi të gjithë në të njëjtën kohë siç parlajmëroi Shvejku

    Nga Oerd BYLYKBASHI – Që të mos çmendemi të gjithë në të njëjtën kohë siç parlajmëroi Shvejku

    Pika 2 e nenit 148/dh të Kushtetutës, e shtuar me reformën e “famshme” në drejtësi në 22 korrik 2016 përcakton se:

    “Prokuroria e Posaçme përbëhet nga të paktën 10 prokurorë, të cilët emërohen nga Këshilli i Lartë i Prokurorisë për 9 VJET, PA TË DREJTË RIEMËRIMI.”

    Kushtetuta është fare e qartë. Nuk ka vend për interpretim. Dhe absolutisht ka qenë e menduar për të qenë kështu dhe nuk është harresë e kushtetutëbërësit.

    Kryeprokurori i SPAK dha dy argumenta “dërrmues” për pretendimin e trupës së prokurorëve të SPAK pse këta prokurorë duhet të qëndrojnë në detyrë pa afat, ose së paku të kenë të drejtë të riemërohen për mandat tjetër 9-vjeçar:

    – Një prokuror dashurohet me çështjen, e njeh në detaj edhe në 12 të natës, por vjen fundi i mandatit dhe detyrohet ta lejë çështjen. Prokurori tjetër që do ta zëvendësojë nuk ka të njëjtën “dashuri” për çështjen.

    – Zhvillimet e krimit po zgjasin afatet e hetimit të çështjeve dhe duhet me shumë kohë nga një prokuror.

    Hetimi nuk është çështje “dashurie”, përndryshe kjo është një dashuri morboze. Hetimi është çështje ligji, procedure, provash, objektiviteti dhe drejtësie.

    Afatet e hetimit janë shumë më të shkurtra se 9 vitet e mandatit të një prokurori të SPAK. Pra koha i del dhebi tepron. Mos e dhëntë Zoti t’i shkojë kujt në mendje të zgjasë hetimet e një çështjeje deri në 9 vjet. As diktaturat nuk e çojnë në mend.

    Kanë 3 vjet që hetojnë liderin e opozitës pa regjistruar asnjë akuzë, ama e arrestuan. Nuk e arrestuan pse mund te kryejë sërish krimin, mund te prishë provat apo se mund të largohet, por për ta ndëshkuar pse kundërshtoi si antikushtetuese kufizimet e lirisë së një deputeti të zgjedhur nga populli. Sa kohë mund ta mbajnë peng duke e penguar të drejtojë opozitën? Mos vallë deri në zgjedhjet e pranverës 2025? Apo deri kur të vijë momenti që të bëjë betimin si deputet i zgjedhur dhe të pengohet të marrë mandatin e për ta zëvendësuar me një masë arresti siç po ndodh me kryetarin e zgjedhur me votë të bashkisë së Himarës?

    Nëse do të plotësohej ky pretendim i 17 prokurorëve, do të forcohej rreziku që kam denoncuar në 2016 si nënkryetar i Komisionit te Reformës në Drejtësi kur debatoheshin amendamentet, që ky organ rrezikon të kthehet jo thjesht në një korporatë, por në një vëllazëri të rrezikshme. Selektiviteti nën ndikimin e korrupsionit, politikës, apo thjesht se këta prokurorë vendosin ata se kush do të jetë politika dhe jo votuesit me votë, janë rreziqe të rënda që qëndrojnë pas kësaj porte.

    Kjo do të ishte një ndërhyrje serioze me 94 vota në Kushtetutë që do ta përkeqësonte arkitekturën kushtetuese të Drejtësisë që edhe kështu siç është, ka difekte të rënda.

    Por pa u lodhur më tej, përgjigjen pse SPAK e kanë gabim pretendimin që të kenë të drejtë riemërimi, e ka dhënë në 2008 Komisioni i Venecias kur u vu mandat 5-vjeçar për

    Prokurorin e Përgjithshëm e që na shtyu ne 2016 që mandati i prokurorit të SPAK të ishte i gjatë 9 vjet dhe pa riemërim:

    “Neni 9 që ndryshon nenin 149

    20. Formulimi i ri parashikon që Prokurori i Përgjithshëm emërohet nga Presidenti me pëlqimin e Kuvendit për një mandat pesë vjeçar me të drejtë riemërimi. Ky amendament duket një hap prapa dhe rrezikon të komprometojë paanshmërinë e Prokurorit të Përgjithshëm, veçanërisht në periudhën kur ai ose ajo kërkon rizgjedhjen. Do të ishte e preferueshme një afat më i gjatë pa mundësinë për t’u riemëruar. Në një Opinion mbi projekt-amendamentet e Kushtetutës së Ukrainës (CDL-AD(2008)029, paragrafi 33) Komisioni i Venecias deklaroi: “Sipas seksionit 3 të propozuar, mandati i Prokurorit të Përgjithshëm do të zgjatet nga 5 në 7 vjet. Ky afat më i gjatë duhet të zvogëlojë politizimin e funksioni dhe mund të jetë një garanci për paanshmërinë e Prokurorit të Përgjithshëm. Prandaj, duket një hap në drejtimin e duhur. Do të duket edhe më mirë të parashikohet që Prokurori i Përgjithshëm mund të qëndrojë në detyrë deri në mbushjen e moshës së pensionit ose, nëse preferohet një mandat i kufizuar, të përjashtohet mundësia e riemërimit, siç është rasti për gjyqtarët kushtetues sipas nenit 148 të Kushtetutës [së Ukrainës]. Përndryshe, Prokurori i Përgjithshëm mund të ndikohet në mënyrë të padrejtë në vendimet e tij ose të saj nga dëshira për t’u rizgjedhur.”

    Kaq mjafton!

  • Nga Luçiano BOÇI – Republika e Mafias

    Në një shkrim pa bujë por me plot kuptim një gazetar i mirënjohur nënvizoi një fakt rrëqethës pavarësisht ekzotizmit që përmbante:

    Disa ndërkombëtarë, miq të Kryeministrit, i drejtoheshin këtij të fundit me nofkën përkëdhelëse “Feliks”.

    Për ata që nuk e njohin bëhet fjalë për Miguel Angel Felix Gallardo bosin e njohur të kartelit të Guadalajarës, i cili arriti të bashkonte në një konfederatë krimi të gjitha kartelet meksikane.

    Por më të famshëm Feliksin e bëri aftësia e tij dhe angazhimi për të diktuar zgjedhjet politike në favor të partisë, apo individëve politikë, me të cilët këmbente favoret përkatëse.

    Përkëdhelja duket e gjetur nga miqtë e tij. Është një përkufizim i saktë i portretit real të Ramës.

    Të dy megjithëse në kontekste historike dhe gjeografike të ndryshme janë përfaqësuesit tipikë të krimit politik.

    Me disa ndryshime të vogla.

    Felix Gajardo mbeti deri në fund një shërbëtor i politikës, ndërsa Rama është deri në fund një shërbëtor i karteleve.

    Feliks Gajardo nuk veshi kurrë kostum politik dhe maksimumi kaloi portën e një partie për “biznes”, ndërsa Rama që kur u bë përfaqësues politik hyri me kostumin e politikanit dhe madje sot është në ofiqin më të lartë të politikës, falë mbështetjes së mafias e narkotrafikut.

    Përkëdhelja e ndërkombëtarëve ka brenda pranimin dhe cinizmin tipik evropian ndaj atyre që i shohin si modele inferiore, por që nuk ia shprehin drejtpërdrejtë për shkak të etikës dhe sidomos interesit, derisa te piqet momenti i duhur.

    Dhe momenti po afrohet. Perdet kanë kohë që kanë rënë duke nxjerrë në pah atë që shumica e shqiptarëve e di: REPUBLIKËN E MAFIAS.

    Një republikë ku mafia dhe shteti nuk kanë kufij dhe ku drejtuesi kryesor politik, Kryeministri, sot përfaqëson mafien politiko-kriminale të veshur me pushtet.

    E kjo nuk është retorikë politike sado të ngjajë si gjuhë akuze. Është përkufizim i saktë i asaj çka është prodhuar keto vite ne Shqipëri.

    Kjo që ka ndodhur me republikën tonë nuk ka të ngjashëm askund.

    As në Itali ku mafia ka lindur, ajo nuk arriti të marrë pushtetin politik. Akuzat dhe për këtë nuk kanë munguar, referuar së vërtetës. Mafia kishte përfaqësuesit e vet kudo deri në sferat më të larta, por simbioza mbeti e kufizuar pa arritur të rrëmbejë të gjithë shtetin.

    Në Kolumbinë e Escobarit, e njëjta gjë. Politika dhe kartelet ndanin të njëjtin territor, por portat e politikës qëndruan të mbyllura dhe për vetë Escobarin , mgjs ishte ai që përcaktonte fituesin.

    Meksika ruan pamje të ngjashme. Kartelet janë shpesh në rivalitet politik duke eliminuar dhe kandidatë politikë. Feliksi mbahet si më i suksesshmi për shkak të natyrës negociatore, por vetë ai apo të tjerë bashkëpunëtorë megjithatë nuk e kapën dot politikën në maja për ta drejtuar vetë, pavarësisht financimeve e mbështetjeve që ofronin për partitë përkatëse.

    Përkundrejt kësaj në Republikën e mafies sonë nuk dihet ku fillon mafia e ku mbaron shteti.

    Sepse janë një trup i vetëm i drejtuar nga një njeri dhe kupolë e vetme me etiketën Rilindje. Kontrollojnë çdo qelizë ekonomike, sociale e politike dhe kanë armët efikase të drejtësisë, policisë, bandave, administratës e killerave në dispozicion, me të cilat drejtojnë vendin, diktojnë votën, sulmojnë opozitën, zhvasin pasuri me ligj e pa ligj e peshojnë si në tregun e gjësë së gjallë para e vrasje.

    Dhe më saktë se e zbulojnë këtë realitet veprimet e SPAK, policisë e gjykatave nuk besoj se ka.

    Aksioni show i fundit i vuri vulën Republikës sonë së mafias. Askush nuk u arrestua realisht, përpos atyre që tashmë janë në situatë të tillë. Dhe këta u shtuan si pjesë e sakrificës që anëtarët e mafias e pranojnë si kontratë në emër të shpëtimit të kupolës.

    Kupola nuk përmendet fare dhe madje krahu juridik i mafias ka fshirë dhe komunikimet e tyre nga të dhënat e Sky Encrochat dhe transmeton mediatikisht atë që do.

    Show i prodhuar krahas shmangies së vëmendjes nga aferat e shpërthyera, kërkon të mbyllë kapakun e dimensionit kriminal të krerëve kryesorë politikë alias krerëve të të mafias dhe të buratinit-Kryeministër të REPUBLIKËS SË MAFIAS.

  • Nga Alfred LELA – Operacioni i SPAK si një martesë në Las Vegas

    Nga Alfred LELA – Operacioni i SPAK si një martesë në Las Vegas

    Ajo që duhet thënë që në fillim për bujën e madhe të 50 fletë-arresteve dhe duartrokitjeve flakëruese për SPAK, është se dosja kriminale mbi të cilën mbështeten këto mandate është më e madhe dhe më e bujshme se aksioni i Prokurorisë Speciale, por edhe se tronditja vetë.

    Dosja nuk duhet lexuar si një roman kriminal-kjo është prirja që vihet re në debatin politik dhe mediatik-por si një autopsi e plotë e trupit social dhe politik të Shqipërisë. E di që është shumë ta thuash dhe të kërkosh këtë nga prokurorët, gazetarët apo politikanët shqiptarë, por nuk do të thotë se nevoja alarmante nuk thërret.

    Dosja prej 240 faqesh, që qarkullon ndër gazetarë dhe duar të tjera të fijeve dhe dijeve, shpalos pamjen, jo të Shqipërisë kriminale, por të Shqipërisë politike. SPAK nuk e qëmton fare këtë përmasë. Nuk e di nëse e ka nga padijenia, pazotësia apo anësia, por në asnjë dekik të kohës dhe mendimit nuk pulson vetëdija se, mes përplasjes gjakatare të bandave dhe shtetit, të futur si aktor në këtë përplasje, ka një dallim të thellë.

    Te ky dallim është zgjidhja për sot dhe nesër, jo te telenovela me Dur Bamin, Marklen Hakën, Ervis Martinajn, Mil Shullazin e shumë të tjerëve. Prania e shtetit në labirintin kriminal është aq e fortë sa i bën kriminelët të duken personazhe thuajse simpatikë. Mua, apo çdo qytetari nuk i duhet fare se ç’bën Markleni dhe Duri, por ama na intereson shumë, për jetë a vdekje, çfarë bën polici, prokurori, gjykatësi, deputeti, që janë ngarkuar për të kufizuar, ndëshkuar dhe kontrastuar Ervisët dhe të ngjashmit e tyre. Kur sheh se të parët dhe të dytët bëhen bashkë kundër disa të tretëve, ne nuk mund dhe nuk duhet të kuptojmë se kjo është një luftë mes bandash, apo siç thotë KM ‘hëngshin kokat e tyre’, por se një ditë, herët a vonë, palë a viktimë në këtë përplasje të përgjakshme mund të jetë secili nesh.

    Përmasa e dytë e patrajtuar, por dramatike, e dosjes është përfshirja e krimit në zgjedhje. Akuzat apo dyshimet e rreshtuara për personazhet kriminalë të dosjes përfshijnë tentativë për vrasje, armëmbajtje, kultivim apo trafikim narkotikësh etj. Përfshirja, e të njëjtëve individë, në shtabet elektoralë të PS, në komisionet apo në ‘grupet e gatshme’ të kërcënimit dhe manipulimit të zgjedhjeve të fundit apo një herë më parë, nuk fotografohet në asnjë rast. Kur kryqëzon emrat, që SPAK ka në dosjen penale, me denoncimet e mbledhura në rreth 600 faqe të “Librit të zi të zgjedhjeve”, botuar nga Partia Demokratike, sheh se thuajse të gjithë kanë qenë protagonistë të manipulimit elektoral në krah të Edi Ramës. Pse nuk e sheh SPAK këtë? E mendon krimin zgjedhor si më të parëndësishëm? Nëse po, ja një aksiomë për ta: kur qytetari humbet të drejtën për të zgjedhur dhe për tu zgjedhur, në liri dhe pa ndërhyrje, në një demokraci, të gjitha të drejtat e tjera zerohen. Vetë SPAK kthehet në një institucion të shtrembëruar, sepse është emëruar mbi premisa jolegjitime, që burojnë nga procese të manipuluara votimi.

    Dilema që shtrohet është: pse e shmang SPAK krimin zgjedhor si pjesë të repertorit të grupeve kriminale që ka skanuar, dhe për të cilët ka lëshuar urdhër-arreste? Rekordi i këtij institucioni është përsëritës në këtë plan: Prokuroria e Posaçme e ka shmangur njëherë hetimin e zgjedhjeve, në rastin e dosjeve 184 dhe 339, duke ia kaluar prokurorive lokale.

    Po e shmang sërish. Dhe, gjërat që mungojnë apo shmangen, flasin më shumë se ato për të cilat bërtitet në kupë të qiellit. Siç është rasti i bujës për 50 mandat-arrestet të cilat i ngjajnë një martese incognito në Las Vegas. Kur një burrë e një grua ‘lidhin kurorë’ në kapelën e një kazinoje, ceremonia shërben vetëm për kujtimet, për instagramin, për adrenalinën, por nuk futet në rekordet legale të shtetit të Nevadës apo kushtëzuese të çiftit. Të cilit i duhet të shkojë në një bashki të vërtetë dhe një kishë të njëmendtë. Edhe SPAK nuk mund ta bëjë ‘ceremoninë’ me ‘çifte’ të Dubait apo të Las Vegasit dhe të presë legjitimim.

    Është në Tiranë ajo që vlen, që vret zgjedhjet, procesin politik dhe vetë imazhin e SPAK.

  • Gabriel Escobar si Miladin Popoviç!

    Gabriel Escobar si Miladin Popoviç!

    Nga Enver Bytyçi

    Gabriel Escobar ka kërkuar sot që Partia Demokratike e Shqipërisë e vitit 1990-1991 të zhduket nga skema e sistemit politik të vendit tonë. “Shqipëria, thotë ai, duhet të ketë dy parti politike që bashkëpunojnë me njëra tjetrën” dhe njëra prej tyre është Partia Socialiste e Edi Ramës e themeluar në vitin 1941! Tjetra një parti demokratike tjetër, jo ajo e vitit 1991.

    D.m.th të zhduket partia shqiptare e themeluar në vitin 1990 e të mbetet në pushtet partia e themeluar nga Miladin Popoviç në vitin 1941. Kjo është logjika e Escobar! Sipas kësaj logjike diplomati amerikan preferon që në Shqipëri të ushtrojnë aktivitetin politik vetëm partitë politike pro-serbe dhe në politikën shqiptare të mbijetojnë vetëm ata që brohorasin për Serbinë e kundër Kosovës dhe Shqipërisë!

    Ba me e lexu këtë status, Escobar do të thotë se kjo që po shkruaj unë është shpifje! Atëherë kush je ti zoti Escobar që i përcakton partive politike se kë duhet të zgjedhin në krye?! Të ishte guvernator i Shqipërisë, unë do të isha më i lumtur se sa në këto kushte. Sepse si guvernator do mbaje përgjegjësi.

    Së dyti, dua t’i kujtoj atij se autori i famshëm Neale Donald Walsch në librin e tij “Bisedë me Zotin” i ka drejtuar Perendisë edhe këtë pyetje: – Pse i le njerëzit të gabojnë e ta vështirësojnë jetën e tyre?

    Zoti i përgjigjet: – Unë i kam sjellë njerëzit në jetë si qenie të lira. Nëse unë do u diktoja atyre se çfarë të bëjnë, atëherë ata nuk do të mund të jetonin në lirinë e tyre!

    Zoti i madh nuk pranon të diktojë se çfarë duhet të bëjnë njerëzit e lirë! Gabriel Escobar i dikton shqiptarët se kë duhet të zgjedhin në politikë! Imagjino deri ku shkon arroganca!

    Më kujtohet thirrja që presidenti i Serbisë, Aleksandër Vuçiq u bëri shqiptarëve më 20 prill 2021 që të votojnë Edi Ramën. Sepse po të votoni opozitën e Partisë Demokratike, thoshte Vuçiq, ju votoni Sali Berishën! E pati shpallur hapur, si asnjë lider politik i mëparshëm i Serbisë, preferencën për Edi Ramën dhe urrejtjen për Sali Berishën. Çfarë ndryshon sot deklarata e Escobar nga deklarata e Vuçiq para më shumë se tri vitesh?!

  • Me SKY ECC, si u shndërruan shefat e policisë në ushtarë të Krimit!

    Me SKY ECC, si u shndërruan shefat e policisë në ushtarë të Krimit!

    Me mesazhet e përftuara nga aplikacioni SKY ECC krijohet një hartë për gjeografinë e krimit në Shqipëri, madje mund të përcaktohen edhe zonat ku forca e krimit i mbivendoset vullnetit të Policisë së Shtetit. Sepse në jo pak raste, mesazhet e SKY tregojnë llumin ku është zhytur policia shqiptare sot.

    Në mesazhet e SKY ECC nuk flitet për ryshfetin e zakonshëm me pak lekë të policëve të qarkullimit, as për ndonjë shkelje të rëndomtë ku polici i thjeshtë bën një sy qorr e një vesh shurdh për një grusht me para. Në to bisedohet për organizimin e vrasjeve nga grupet më të rrezikshme kriminale në vend, ku shefat e policisë japin një ndihmë duke dhënë informacione sekrete. Flitet për parcela me kanabis, ku shefat e policisë qëndrojnë si mburojë dhe shqetësohen bashkë me trafikantët se po policë të tjerë po vijnë dhe po ua shkatërrojnë. Flitet në këto mesazhe edhe për kazino të fshehta apo për informacione sekrete që i vihen në dispozicion njërës bandë në dëm të bandës tjetër.

    Implikimi i uniformave blu në krim është alarmant. Mesazhet në SKY ECC tregojnë se tradhtia vjen nga kupola drejtuese, njerëz që i japin policisë fytyrën e një bishe që ka dalë jashtë kontrollit.

    Klodian Shahini, bashkëpuntor në shpërthimin shkatërrues në Tiranë

    Shpërthimi i makinës tip Benz në urën tek Nisharaku në Tiranë katër vite më parë nuk është i vështirë të sillet ndërmend. Sepse ndodhi në pikun e lëvizjes së kalimtarëve dhe makinave në këtë zonë, përgjatë një pasditeje të ngrohtë shtatori, që ruhet ende e freskët në kujtesën e banorëve të zonës.

    Pamjet e një njeriu që gulçonte nga dhimbjet brenda gjysëm-makinës të shkatërruar morën brenda pak sekondash vëmëndjen e opinionit. Emri i burrit që i mbijetoi atentatit ishte Preng Gjinit, një 50-vjeçar nga Mirdita, që tërhiqte pas vetes zinxhirin e hakmarrjes me fisin Reçi.

    Menjëherë u rihapën arkivat e vrasjeve mes dy fiseve të Mirditës për ta shpjeguar atentatin me përmasat e një akti terrorist. Intuita e gazetarëve nuk ishte e gabuar. Përgjimet e SKY ECC në dosjen që disponon Lapsi.al konfirmojnë pikërisht atë që raportuan edhe gazetarët asokohe, që shpërthimi ishte ndëshkim për të vrarët në anën e fisit Reçi, më konkretisht organizimi i atentatit ishte kryer nga Elson Reçi që bazuar në mesazhet e SKY ECC, u hidhërua tej mase kur Preng Gjini i mbijetoi dy kallëpeve me tritol që i shpërthyen nën kroskotin e makinës.

    Por ajo që nuk dihej në atë kohë ishte se Elson Reçi kishte edhe njeriun e tij në polici që e ndihmoi për të kryer atentatin. Klodian Shahini, në atë kohë ka pasur detyrën e shefit të Seksionit të Trafiqeve të Paligjshme dhe Narkotikëve në Drejtorinë Vendore të Policisë Lezhë. Ai është vetëm një nga policët e zbuluar në përgjimet e SKY ECC, që veshi uniformën blu thjesht si kamuflim, sepse në të vërtetë qëndroi në shërbim të krimit.

    Nga dosja e SPAK, thuhet se Klodian Shahini ishte kushëri me organizatorin e atentatit, Elson Reçin.

    “I kam bo llogaritë e mia. Do sakrifikoj vetë për pjesën tjetër të familjes. Unë e kam vendin brenda katër mureve” shkruan Elson Reçi në SKY ECC në një moment sinqeriteti, duke pranuar fatin e tij si ushqim për gjakmarrjen me fisin tjetër të Mirditës. Dhe në këtë mision, kushëririn e tij Klodian Shahini e ka në krah.

    Në dosjen e SPAK janë disa momente kur shefi i policisë së Lezhës, Klodian Shahini përdor sistemet e Policisë së Shtetit për të verifikuar mjetet që i duhen Elson Reçit. Ai kontrollon vazhdimisht makinat me të cilat lëviz objektivi i tij dhe përdor SKY ECC për të komunikuar me Klodian Shahinin. Në disa  raste, thuhet në dosje, ai thjesht dërgonte foton e një makine dhe Klodian Shahini e verifikonte pa pasur nevojë t’i thoshte asnjë fjalë, por i dërgonte të dhënat e makinës.

    Ishte kjo mënyra me të cilën Preng Gjini u lokalizua. Kështu u gjetën mjetet me të cilat ai lëvizte për t’i vendosur më pas tritolin që shpërtheu tek ura e Nisharakut në Tiranë.

    Bashkëpunimi për atentatin ndaj Gjinit ishte vetëm një anë e medaljes. Puna kryesore e Klodian Shahinit ishte të manipulonte të dhënat për parcelat me kanabis, megjithëse ai drejtonte Seksionin e Trafiqeve të Paligjshme dhe Narkotikëve në Lezhë.

    Elsoni shërben si ndërmjetës i Klodian Shahinit me personat që kultivojnë lëndë narkotike për të dhënë informacione në rast se policia organizon operacione për gjetjen dhe prishjen e parcelave apo edhe për t’i dhënë mbrotje atyre në zonë” thuhet në dosjen e SPAK.

    Ky rol ilustrohet me disa biseda ku bie në sy se Klodian Shahini i bindet plotësisht grupeve kriminale, madje në valle fut edhe shefin e tij, Henerigert Mitri, i cili në atë kohë ishte Drejtor i Policisë Lezhë. Së bashku bien dakort të fshehin filmimet me dron mbi parcelat me kanabis apo të njoftojnë kultivuesit e kanabisit për itinerarin e helikopterit të Guardia di Finanza, gjithnjë duke i servirur informacione mbi targat e mjeteve dhe hyrje-daljet në TIMS për shënjestrat e bandave.

    Ushtari i Pëllumb Gjokës, Drejtori i Policisë Lezhë, Henerigert Mitri

    Biznesmeni Pëllumb Gjoka që është arrestuar gjatë aksionit të parë të SPAK në bazë të përgjimeve të SKY ECC rikthehet në skenë edhe në dosjen e dytë falë aftësive të tij për të rekrutuar policët në punët e tij. I tillë është rasti i Drejtori i Lezhës, Henerigert Mitri. Ky i fundit nuk i ka rezistuar ofertës për të bërë një sy qorr e një vesh shurdh në lidhje me një kazino të vogël, me rreth 20 kompjutera që Pëllumb Gjoka e kishte përshtatur në Lezhë.

    Por kur një oficer i Drejtorisë Hetimore, i quajtur Gentian Ndoji i futet në kazino, arreston menaxherin dhe sekuestron kompjuterat, për Henerigert Mitrin, që kishte dalë garant mbi ecurinë e biznesit, dalin probleme.

    “Drejtor tjetri” habitet Oltion Bistri ish-shef i operacionales, kur e njoftojnë çfarë kishte ndodhur me biznesin fitimprurës të Pëllumb Gjokës në Lezhë. Vetë Bistri ishte garant për kazino të tjera të Gjokës dhe para se të merrte përsipër një punë, gjithnjë konsultohej paraprakisht me shefat e tij.

    “Pajisjet janë kapur dhe “Gerti” nuk duhet t’i kishte dhënë siguri Pëllumbit në zhvillimin e këtij aktiviteti nëse nuk ka pasur dakortësinë e eprorëve” shkruhet në dosjen e SPAK, një përmbledhje e këshillave që jep Oltion Bistri.

    Henerigert Mitri përveç të tjerash përshkruhet në mesazhet e SKY ECC edhe si “I madhi” falë rolit që kishte ai si drejtues i policisë së Lezhës. Sigurisht që garancia për vetëm një kazino ishte shumë pak për një drejtor.

    Mitri ka bërë çmos bashkë me Klodian Shahinin, drejtorin e antitrafiqeve në Lezhë për të shpëtuar parcelat me kanabis. Por megjithë përpjekjet që bëjnë për të shmangur kontrollet në zonat e mbjella me kanabis, në fund duket se Henerigert Mitri dështon dhe nuk arrin të sigurojë punët që ka marrë përsipër pasi policët “nga Tirana” vinin dhe u prishnin punë.

    Gjykata e Posaçme e Shkallës së Parë për Korrupsionin dhe Krimin e Organizuar ka caktuar ndaj tij masën e sigurimit personal “arrest në burg” dhe e akuzon për “kultivim i bimëve narkotike, kryer në bashkëpunim”, “grup i strukturuar kriminal”, “pjesëmarrje në grup të strukturuar kriminal”, “korrupsion pasiv i personave që ushtrojnë funksione publike”, “organizimi ose ushtrimi i veprimtarisë së lojrave të fatit në kundërshtim me ligjin” dhe “shpërdorim i detyrës”.

    Ushtari i Durim Bamit, efektivi i RENEA-s Altin Morina

    Gati një vit më parë, Altin Morinën me detyrë Shef i Repartit të Stërvitjes tek Forcat RENEA e kapën në zonën e Kodrës së Diellit, teksa lëvizte me një mjet luksi. Brenda në makinë iu gjetën 113 mijë euro, që efektivi i RENEA-s e kishte të vështirë t’i justifikonte.

    Lajmi kaloi tangent në media dhe teoritë konspirative për lëvizjet e 43-vjeçarët nuk ngjitën shumë, për t’u harruar brenda pak ditës. Por në dosjen e SPAK për mesazhet e SKY ECC, Altin Morina rikthehet si ushtar i vrasësit me pagesë, Durim Bami.

    Në kapitullin ku pasqyrohen komunikimet e Durim Bamit me Endrit Doklen dhe Xhelal Rrajën, del edhe emri i Altin Morinës.

    Fillimisht ai është i shqetësuar për mikun e tij Durim Bami, të cilit i thotë se i ka shkruar 100 herë, por nuk ka marrë përgjigje. Më pas, të dy bisedojnë për lëvizjet e ish-deputetit të Partisë Socialiste në Tiranë, Arben Ndoka.

    Morina duket i gatshëm të ndihmojë me ç’të mundet, informacion, ndërhyrje dhe këshilla të veprimeve që ai i njeh mirë, si për shembull metodat për t’iu ruajtur përgjimeve ambjentale të policisë. Disa herë ai e këshillon Durim Bamin të ruhet dhe të urdhërojë njerëzit e tij të mos flasin shumë sepse me gjasë janë në përgjim.  Ai është i gatshëm të krijojë kontakte me shefin e komisariatit nr.2 në Tiranë, që prokurorët e SPAK kujdesen të përcaktojnë se ka qenë në detyrë gjatë kohës së Drejtorit të Përgjithshëm të Policisë, Ardi Veliu.

    Ish-shefi i Krimeve Ardit Hasanbegaj, ushtar i Pëllumb Gjokës

    Shefi i krimeve në Shkodër, Ardit Hasanbegaj ka qenë një nga personat e rekrutuar nga Pëllumb Gjoka dhe që është zbuluar nga mesazhet e dosjes “Metamorfoza 1” Pas vrasjes së Gjin Boriçit në 9 Gusht 2020, Gjoka e urdhëron shefin e krimeve të mos merret me zbulimin e vrasjes, ndërsa i kërkon informacion për një nga shënjestrat e tij, pjesë e grupeve kundërshtare, Dorian Dulin.

    Lexoni më poshtë se çfarë shkruhet në dosjen “Metamorfoza 1”

    “Në orën 14.49 shtetasi Pëllumb Gjoka duke përdorur 7142D9 komunikon me përdoruesin e DGLXJM i identifikuar si Ardit Hasanbegaj.

    Pëllumbi e pyet se, cfarë ishte ajo e mbrëmshmja (vrasja e Gjin Ndoj).

    Ardriti i përgjigjet që, nuk e di, paska qenë me hasmëri, për punën e një vëllait, plus paska qenë kollarexhi.

    Pëllumbi e pyt që, si duket si dorë?

    Ardriti i përgjigjet që, ka punuar mirë kopili dhe si duket kanë qenë dy ose më shumë. Të vështirë do e kemi por besoj do të nxjerrim dicka.

    Pellumbi i thotë që, lëreni në kollaren e vet.

    Në orën 17.09 shtetasi Pëllumb Gjoka duke përdorur 7142D9 komunikon me përdoruesin e DGLXJM i identifikuar si Ardrit Hasanbegaj dhe ky i fundit e pyet nëse, ky e njihte DD sepse vëllai i ktij ka takuar Dor Dulin.

    Pëllumbi i shprehet që, këta të vrasin dhe të vijn edhe me u pjek.

    Pëllumbi i shkruan Arditit nëse, ke info për Dorin më thuaj”

    Konfirmohet nga bisedat se ish-shefi i Krimeve të Shkodrës, Ardit Hasanbegaj i shërbeu bandës së Bajrave edhe për kërkimet e Ibrahim Licit, që ishte shënjestra e tyre kryesore në Shkodër. Madje familja Lici u vu në përgjim për komunikimin me Ibrahim Licin dhe informacionet e policisë kalonin direkt tek banda kundërshtare që kërkonte vrasjen e tij. Pasi biznesmeni Pëlumb Gjoka gjen numrin e celularit të Ibrahim Licit, ia kalon këtë shefit të krimeve që e vë në përgjim dhe i raporton:

    “Atij nuk i ka dalë asnjëherë në valë antenna, vetë aty në shtëpi dhe është i vëllai se e njeh në zë ai lart (operatori i përgjimit), i njeh si shtëpi, ua njeh zërat.

    Arditi në vazhdimësi i tregon Pëllumbit që “Dori ka qenë në Tiranë dje, më tha ai shoku, ka takuar një zyrtar. Jo në “pol”, por nuk e ka thënë si emër, një zyrtar se i ka kërkuar takim, më tha shoku. Pëllumbi shprehet që “do ketë takuar ndonjë nga lsi”.

    Oltion Bistri, ish shefi i policisë, ushtar i Pëllumb Gjokës

    Oltion Bistri është ndër oficerët më të lartë të goditur nga Metamorfozat. Në momentin kur u arrestua, ai sapo ishte shkarkuar nga detyra si shef i Forcave Operacionale. Më herët kishte qenë drejtor policie në Lezhë, Durrës dhe shef i komisariatit nr.2 në Tiranë.

    Disa ditë më parë SPAK i sekuestroi miliona euro pasuri, mes të cilave 22 dyqane, 10 apartamente, një vilë, një sipërfaqe tokë truall dhe një garazh. Gjatë përgjimeve të SKY ECC, kuptohej se Bistri kishte dalë garant për kazinotë e Pëllumb Gjokës në Tiranë në këmbim të ryshfetit.

    “Më datë 25.11.2019 ora 03.17 shtetasi Pellumb Gjoka duke përdorur 7142D9 komunikon me përdoruesin e DB7ED1 i identifikuar si Oltian Bistri. Ky i fundit i shkruan, ai tek xhevo kishte thène, ka 25 kompjutera dhe nje ruletë. Ju kish thene do e filmoj tjua sjell edhe dua I miljon lek për informacionin. E gjen dot cili eshte? Sma tha dr. Se ai ma tha para se te ikja, kish merak e para se te ikja ne Gjermani me takoj. Duhet kujdes pak se drejtori eshte trembur. I thash per njërin qe donte te fuste tre copè dhe kishte frike”, shkruhet në dosje për komunikimin mes Bistrit dhe Pëllumb Gjokës.

    Byroja Kombëtare e Hetimit, strukturë paralele me policinë e shtetit

    Zbardhja e komunikimeve me SKY ECC ka zbuluar se policia e shtetit është infektuar deri në nivelet më të larta në bashkëpunimin që ka me krimin. Nga mesazhet e SKY ECC kuptohet se nuk janë policët e thjeshtë ata që i shërbejnë krimit, por janë drejtuesit e policisë që shndërrohen në ushtarë të grupeve kriminale.

    Prandaj dhe në SPAK, duket se besimi tek policia është i ulët. Kreu i Prokurorisë së Posaçme, Altin Dumani pranoi disa javë më parë se ka çështje për të cilat e ka të pamundur të punojë me policinë, ndaj zgjedh të punojë vetëm me Byronë Kombëtare të Hetimit.

    “Janë një kategori çështjesh që ne nuk mund ti hetojmë me policinë e shtetit, sidomos ata kur përfshihen punonjësit e policisë së shtetit. Hetimet tona kanë treguar që eksponentë të policisë së shtetit, madje me funksione të larta kanë bashkëpunuar me krimin e organizuar, referuar dhe cështjeve që kemi hetuar, dhe çështjeve që kemi në hetim e sipër. Janë një kategori çështjesh që ne hetojmë ekskluzivisht me BKH-në” u shpreh Dumani.

    Pavarësisht kësaj deklarate, rezultatet kanë qenë jo të kënaqshme. Operacionet e ekzekutimit të arrestimeve të dosjeve Metamorfoza 1 dhe 2 kanë qenë një dështim. Banditët kryesorë të episodeve kriminale janë larguar në kohë dhe nuk janë arrestuar.

  • Nga Andi BUSHATI – Çfarë tregon zbardhja e skemave të vrasjeve nga SPAK

    Rritja e statistikave të të arrestuarve nga SPAK, në mënyrë krejt paradoksale, po zhbën ditë pas dite arsyen për të cilin ky institucion u ngrit. Sa më shumë vjedhje kolosale apo skema vrasjesh kriminale që zbulohen, aq më tepër mpaket besimi i publikut se pandëshkueshmërisë po i vjen fundi.

    Këtë dëshmoi edhe dosja e rradhës për aktivitetin e disa prej bandave më të rrezikshme të vendit, që operonin në zonën mes Lezhës, Laçit, Fushë Krujës dhe Tiranës.

    Çfarë gjejmë aty? Një ish deputet të PS-së, Arben Ndoka, që për muaj të tërë angazhon një ushtri me vrasës, për të kryer një krim. Një përfaqësues të Rrahjave, klanit tjëtër të një ish deputeti rilindas, i cili organizon një pritë për vrasje, këtë radhë kundër vetë Arben Ndokës. Pastaj në skenë del, Astrit Avdyli, personazhi i dosjes 339, i bërë i famshëm nga përgjimet e Bild, që prej qelive të paraburgimit kontrollon killerat me pagesë. Më tej Pëllumb Gjoka, siguruesi i hambarit të votave në Qarkun e Shkodrës, që është i aftë të rekrutojë shefa policie, për të vazhduar aktivitetin ilegal të lojrave të fatit. Më tej, njeriu i afërt i drejtorit të përgjithshëm të policisë, Ardi Veliut (çuditërisht përmendet me emër në dosje), që gënjeu publikisht për krimin elektoral të Elbasanit, i cili spiunon për llogari të grupeve mafioze. 

    Po ta vështrosh nga një këndvështrim ku SPAK refuzon të thellohet, të gjithë këta elementë i lidh një gjë e vetme. Ata, në një mënyrë ose në një tjetër, kanë prodhuar vota për partinë në pushtet. Dhe ky dyshohet se ka qenë çeku i bardhë për të pasur liri në aktivitetin e tyre kriminal.

    Kur ndjek këtë logjikë, natyrshëm të vjen ndërmend pyetja: Po a shkon dot Prokuroria e Posatçme tek ata që i’a falën killerave këtë liri? Ai i prek dot ajo krimet elektorale që kanë rrënjosur pushtetin e një bande të vetme?

    Mjafton të ngresh ketë dilemë për të kuptuar se në mënyrë krejtësisht kontradiktore, SPAK-u, aq sa po e rrënon moralisht këtë qeverisje, duke nxjerrë në shesh të vërteta që as imagjinata më perverse nuk do të kish mundur ti fantazonte, po aq dhe po e përforcon pushtetin e saj, duke mos i prekur thelbin e ekzistencës.  

    Ky konkluzion po aq sa është i vërtetë i për aferat kriminale, vlen njësoj edhe për ato korruptive. Po të zhytesh në skandalin e inceneratorëve sheh se prokurorët dhe hetuesit kanë gjurmuar ata që kanë çuar ndonjë lekë në shtëpi, që kanë përfituar ndonjë biletë udhëtimi apo shtrat erotik hoteli, ndërkohë që nuk kanë guxuar të zbardhin arkitekturën mostruoze të grabitjes që në fund do ti kushtojë shqipëtarëve afto gjysëm miliardi euro. Pra edhe këtu SPAK-u njollos, bën pis, përforcon bestydninë kolektive të një populli që vidhet përditë, por nuk është në gjendje t’i japë përgjigjen se cilët janë hajdutët e vet realë.   

    Pikërisht ky paradoks, ku pikturohet përmes faktesh të panumërta se po bëhet batërdia, por ama ku e keqja sistemike mbetet pa kokë, po rrëndon përditë e më shumë besimin tek një institucion që u ngrit me shpresën se të paprekshmëve do i vinte fundi.

    Për të perifrazuar një shprehje të një prej përkrahësve fillestarë të tij, ish ambasadorit Donald Lu, SPAK nuk po shkon dot tek peshqit e mëdhenj. Ai po kënaqet duke bërë statistikë me cironka, prandaj dhe krimi dhe korrupsioni bëhen më të fortë, ndërkohë që rrjeta duket e mbushur plot me të arrestuar.

  • Metamorfozat, përgjimet e SKY ECC nxjerrin fytyrën tjetër të Rilindjes

    Metamorfozat, përgjimet e SKY ECC nxjerrin fytyrën tjetër të Rilindjes

    Dosja e dytë e hartuar nga përgjimet e SKY ECC që Lapsi.al e disponon është një sagë tjetër banditësh, e denjë për serialet e Amerikës Latine ku vazhdimisht ka intrigë për porositë e vrasjeve, që e kanë zanafillën tek konfliktet e kumarit, hakmarrjet e mbartura, trafiku i drogës, sherret e çastit apo ndonjëherë tek një keqkuptim siç është vrasja e Gjin Ndojit. Aleancat funksionojnë sipas parimit “armiku i armikut tim është miku im” dhe grupe të fortësh nga Tirana bashkohen me të Vlorës, të Laçit lidhin kontrata me të Shkodrës, për t’u bashkuar në Durrës dhe për t’u ndarë sërish në Fushë-Krujë.

    Nga bisedat e zbardhura të SKY në dosjen e lexuar nga Lapsi.al zbulohet një ndërmarrje kolosale e ish-deputetit të Partisë Socialiste, Arben Ndoka që kërkon të vrasë me patjetër Durim Bamin, njeriun që e akuzon për vrasjen e të vëllait, Aleksandër Ndoka. Aty gjenden bisedat e Ervis Martinajt, në një përpjekje për t’u sqaruar me ish-ortakun e tij në kumar Leonard Duka. Janë bisedat e Emiljano Shullazi që angazhohet nga burgu të gjejë vrasësit e Durim Bamit. Janë vëllezërit e deputetëve të Partisë Socialiste, Armando Ndreca dhe Xhelal Rrja, që përdorin SKY ECC herë për drogë e herë për të ndihmuar në një vrasje, apo shefa policie që u binden kokave të krimit si ushtarë të rëndomtë.

    Por ajo që bie në sy mes emrave është që grupet kriminale të dosjeve “Metamorfoza” 1 dhe 2 janë shpesh të lidhur me pushtetin dhe marrin favore apo kanë një familjar të tyre në nivele të caktuara të qeverisjes. I marrim me radhë:

    Ish-deputeti i PS, Arben Ndoka në Lezhë

    Ish-deputet i Partisë Socialiste në Lezhë Arben Ndoka nuk arriti ta çojë deri në fund mandatin e deputetit, kur u përfshi në një sherr në parlament me ish-deputetin e PD, Gent Strazimiri. Shkak i konfliktit u bë denoncimi që ai kishte qenë i akuzuar për shfrytëzim prostitucioni në Itali. Ndoka dorëzoi mandatin e deputetit dhe më vonë u arrestua nga policia për çështjen e pronave në bregdetin e Lezhës gjatë aksionit “Volvo-4”. Në dhjetor 2017, vritet Aleksandër Ndoka vëllai i deputetit dhe që nga ajo kohë ish-deputeti u përfshi në një kërkim të ethshëm të porositësit të vrasjes së tij, gjë që e çoi në bashkëpunim me grupet më të rrezikshme kriminale në vend.

    Ndihmësi i Vangjush Dakos në Durrës, Astrit Avdyli

    Atrit Avdyli është i njohur për komunikimin intensiv që kishte me Vangjush Dakon gjatë fushatës së zgjedhjeve të vitit 2017, për të të bërë presion mbi votuesit në Durrës dhe për të ndihmuar PS. Në bisedat me Vangjush Dakon, kuptohej që grupi i Avdylajve me ndikim në Shijak ishin angazhuar për të mbledhur vota për PS, por kërkonin edhe të impononin kandidatët e tyre në Shijak e më tej. Në përgjimet e publikuara nga media gjermane ‘Bild’, dëgjoheshin edhe emrat e ish-kryebashkiakut të Durrësit Dako, deputetit të PS-së, Jurgis Çyrbja, kryebashkiakut të Shijakut Ardian Kokomani e kandidatëve për deputet e kryebashkiak, Ilir Ndraxhi e Elton Arbana që komunikonin me grupin Avdylaj.

    Pëgjimet e Prokurorisë së Krimeve të Rënda po kryheshin për laboratorin e heroinës në Has, por nga përgjimet e SKY ECC kuptohet se shijakasi ofronte edhe shërbimin e vrasjeve me pagesë nëpërmjet nipit të tij Aldo Avdyli dhe shokut të tij Arben Mërkuri.

    Emiljano Shullazi, i forti që ndihmoi PS në fushatën e 2013 në Tiranë

    Gjatë viteve kur Saimir Tahiri ishte Ministër i Brendshëm, Emiljano Shullazi ishte një ndër njerëzit e paprekshëm nga policia. Socialistët e kishin pasur me vete gjatë fushatës së vitit 2013 dhe në Tiranë ai bashkë me njerëzit e tij kishin punuar për të sjellë në pushtet Rilindjen.

    Shullazi u përmend disa herë nga ambasadorët amerikanë për lidhjet që kishte në nivelet e larta të policisë. Gjatë një bisede në Opinion, ish zv/drejtori i policisë së Tiranës, Erzen Breçani kujtoi një ngjarje qe ka ndodhur ditën e zgjedhjeve, në datën 23 qershor, të 2013.

    “Atë ditë në darkë (23 Qershor 2013) kam lëviz duke kontrolluar shërbimet, se ishte një gjendje jo e mirë. Dhe është e vërtetë. E kam parë para njësisë bashkiake numër 6, Saimir Tahirin dhe Emiljano Shullazin. Sa u afrova unë, u larguan. Ishin para njësisë bashkiake numër 6, ishin bashkë. Saimir Tahiri ishte me kryetarin e njësisë nr.6, ky ishte aty afër”, deklaroi Breçani.

    Pas përfshirjes në vrasje dhe gjobëvënie, Emiljano Shullazi u arrestua dhe aktualisht është në burg. Por siç dëshmojnë përgjimet e SKY ECC ai u përfshi intensivisht në gjetjen e vrasësve për Durim Bamin, siç i kërkonte Arben Ndoka.

    Armando Ndreca, vëllai i deputetit të Partisë Socialiste Eduart Ndreca në Lezhë

    Armando Ndreca është vëllai i deputetit të PS, Eduard Ndreca. Ai është arrestuar bashkë me djalin e xhxhait, Elvisi Ndreca për kultivimin dhe trafikimin e kanabisit.

    Armando Ndreca u arrestua edhe më 10 mars, me dyshimin se ishte i përfshirë në kultivimin e bimëve narkotike, pas zbulimit të një stani të kthyer në shtëpi bari në një fshat të Lezhës. Por Ndreca u lirua nga gjykata pasi nuk kishte prova që vërtetonin implikimin e tij në kultivimin e drogës, ku u arrestuan 2 persona.

    Tashmë me zbardhjen e SKY ECC është konfirmuar përfshirja e vëllait të deputetit socialist në kultivim të kanabisit.

    Madje dy zyrtarët e policisë kanë bashkëpunuar me vëllain dhe kushëririn e deputet Eduard Ndreca, Armando dhe Elvis Ndreca, duke i favorizuar në kultivimin e bimëve narkotike në zonën e Kashnjetit, sipas dosjes që ka lexuar Lapsi.al

    Xhelal Rraja, vëllai i ish-deputetit të PS, Rrahman Rraja në Fushë-Krujë

    Xhelal Rraja është vëllai i ish-deputetit të Partisë Socialiste Rrahman Rraja. Ai përmendet në përgjimet e dosjes Metamorfoza si përdorues i një telefoni SKY me pseudonimin H2. Xhelal Rraja akuzohet se ka marrë pjesë në organizimin e një atentati ndaj Arben Ndokës, së bashku me Durim Bamin dhe Indrit Doklen.

    Së fundmi, Xhelal Rraja u përfshi në rrahjen masive që ndodhi në Thumanë ndaj dy kushërinjve, Jashar dhe Bilbil Maja, ngjarje pas së cilës vëllai i tij deputet dha dorëheqjen. Xhelal Rraja u shpall në kërkim atëherë nga policia po nuk u arrestua asnjëherë.

    Pëllumb Gjoka, investitori strategjik nga “Metamorfoza 1” në Velipojë

    Në grupin e parë të të arrestuarve nga përgjimet e SKY ECC, prokuroria speciale urdhëroi arrestimin e Pëllumb Gjokës, që kishte porositur një vrasje në Tiranë, por që ishte shpallur edhe investitor strategjik nga qeveria Rama. Opozita e kishte akuzuar atë si një person të përfshirë në blerje votash në favor të Partisë Socialiste. I angazhuar më parë në lojërat e fatit, në korrik të vitit 2021 kompanisë së tij Imperial Group, iu dha statusi i investitorit strategjik për ndërtimin e një resorti turistik në Velipojë, me një vlerë prej 52 milion eurosh. Investim i cili nuk nisi asnjëherë.

    Anëtarë të grupit të Bajrave që ndihmuan PS në zgjedhjet e 14 Majit në Shkodër

    Një nga grupet më të goditur nga përgjimet e SKY ECC janë Bajrat e Shkodrës. Ata qenë të përfshirë në disa vrasje, mes të cilave ajo që është zbardhur plotësisht është eleminimi i Gjin Ndojit si porosi e Ervis Martinit. Bajrat bashkëpunonin ngushtë me Pëllumb Gjokën, por në zgjedhjet e 14 Majit u zbulua angazhimi i tyre në ndihmë të Partisë Socialiste. Një prej njerëzve më me ndikim të grupit, Behar Brajoviq del edhe në grupin e dytë të përgjimeve kur flitet për vrasjet e porositura mes bandave.

  • Nga Enver BYTYÇI –  “Ujërat e zeza” kanë plasur! Nuk ka kolektor që i mban më!

    U desh një aksion kontrolli i prokurorëve të SPAK që njerëzia të binden plotësisht se „ujërat e zeza“ të Rilindjes kanë plasur. Për mua kishin plasur me kohë. Qeveria e krimit do të mbushej më kriminelë aq shumë, sa depozita e pushtetit nuk do t’i mbante më. Dhe në fakt kështu ndodhi. Bandat kriminale e mafioze sollën në pushtet përfaqësuesin më tipik të botës kriminale në politikën shqiptare, Edi Ramën.

    Më kujtohet një takim me doktor Berishën diku gjashtë muaj pasi kishin ardhur në pushtet rilindasit. Ishte te godina e Coin. “Jam i shqetësuar Enver, tha doktori, sepse ky (Rama) është i lidhur me bandat kriminale. Një kryeministër bëhet rrezik për vendin edhe po të jetë i korruptuar, edhe po të jetë spiun i një shërbimi armik. Por nëse kryeministri është i lidhur me krimin e organizuar ,me  bandat e tij dhe ato mafioze, atëherë vendi (Shqipëria) vihet në rrezik serioz. Vihet në pikëpyetje ekzistenca e kombit”, vazhdoi Doktori. Unë e kundërshtova. Isha skeptik dhe mosbesues për këtë që thoshte doktor Berisha. I thashë se “nuk është e mundur Doktor, shteti ka funksion pikërisht luftën kundër krimit të organizuar dhe bandave kriminale, ndryshe nuk quhet shtet!”.

    Për të ma mbushur mendjen për ato që thoshte më dha një shembull. – Në Himarë, tha Doktori, një sipërmarrës ka fituar tenderin prej 3-4 milion euro për ndërtimin e një rruge atje. Ky sipërmarrësi është nga Himara. Është i lidhur me Koço Kokëdhimën. Ne i kemi dhënë tenderë rrugësh kur ishim në pushtet. Sepse na dukej se po i fyejmë banorët e Himarës, nëse çonim një firmë nga Tirana për të ndërtuar rrugë të shkurtra në atë zonë. Por çfarë ndodhi? Shkojnë aty dy përfaqësues të organizatës terroriste “Hakmarrja për Drejtësi” dhe i thonë sipërmarrësit himariot, “Hiq dorë nga tenderi, se do e marrim ne”! Ia kërkuan këtë me shkrim. Sipërmarrësi në fjalë kundërshtoi. Atëherë, vazhdoi Berisha, njëri nga këta të hakmarrjes nxori telefonin dhe mori dikë. I tha se ky nuk heq dorë, çfarë të bëjmë me të. Telefonuesi nga Tirana i thotë t’ia kalojë telefonin dhe sipërmarrësi dëgjon: “Edi Rama jam! Bej siç të thonë ata e mos zgjat!”. Këtë histori e kishte dëshmuar vetë i dëmtuari, në shenjë revolte për atë që i ndodhi. Pra, kryeministri i Shqipërisë gjente dhe gjen kohë të merret me interest klienteliste të anëtarëve të një bande terroristësh?!

    U mendova shumë. Njëmijë enigma më vlonin në kokë! T’i besoj Doktorit, apo jo? Nuk doja që kryeministri i vendit tim të ishte kriminel. Por as kisha argument ta kundërshtoja atë që më thoshte Berisha. E kam mbajtur këtë tregim të freskët në mendjen time, sepse nuk më ka lënë ta harroj vetë kryeministri Rama. Me mbështetjen e pa rezervë dhe promovimin e dhjetëra dhe qindra kriminelëve mafiozë e banditë deri në parlament e në qeveri. Irena e tre mbiemrave është rasti më i fundit!  Nuk u desh shumë kohë për t’u bindur se kryeministri i vendit tim është vetë kriminel, madje kreu politik i të gjitha bandave dhe banditëve me shumicë në këtë vend. Tani bandat kriminale e mafioze janë shumëfishuar. Kanë shumëfishuar edhe të ardhurat në valutë. Paratë e tyre të fshehura në shtëpitë e tunelet që ato kanë ndërtuar, e tejkalojnë shumën e parave që bankat tona mbajnë në arkat e tyre.

    Ai ishte padroni i Organizatës Terroriste “Hakmarrja për Drejtësi”, e cila kreu akte terrori në supermarketin VEFA dhe vrau ish- drejtorin e Përgjithshëm të Burgjeve, Kaloshi. Ishte dhe është padron i Sajos dhe bandave mafioze të tij. Ishte dhe mbeti deri në fund besnik i akullores dhe Avdylajve të Shijakut, të cilët i japin postin çdo kandidati rilindas në Bashkinë e Durrësit e më gjerë. Madje paguajnë edhe ndonjë demokrat që të vendosin në krye të pushtetit lokal dhe deri universitet kukullat e tyre të krmit. Durrësi është i rëndësishëm për Edi Ramën, sepse aty kalon kontigjenti më i madh i drogës kolumbiane dhe më gjerë. Ndaj dhe lidhjet me bandat kryeministri i mban direkt, ose përmes sipërmarrësve të mëdhenj oligarkë dhe politikanëve që çon ta përfaqësojnë në qarqe. Jo më kot p.sh Taulant Balla shëtit nga Elbasani në Fier, dy qendrat kryesore të mafies dhe gurpeve kriminale në Shqipëri.

    Ndërsa Vlora është “e pastër”! Askush nuk raporton dot nga Vlora për ndonjë rast të veçantë trafiku të drogës, apo goditjes së bandave kriminale. „Në Vlorë nuk ka mafie, nuk ka kriminelë, nuk ka banditë“! Gjithnjë sipas medieve dhe raportimeve nga qeveria e policia e Edi Ramës. Ndodh kjo, sepse kështu ka urdhëruar kreu i mafies dhe bandave kriminale në zyrën kryeministrore në Tiranë. Vlorën e ka nën survejim dhe nën kontroll direkt të vetin. Pa ndërmjetës. U përpoq në fillim ta ndante tortën vlonjate me Koço Kokëdhimën, por sapo i premtoi të kalojnë pensionin bashkë, e largoi nga vetja.

    Megjithatë ujrat e zeza të bashkëpunimit të qeverisë dhe kryeministrit shqiptar me mafien, si dhe grupet kriminale e mafioze kanë plasur. Tani rezulton se dardhat nuk janë ngënë pas shpinës së kreut tonë të ekzekutivit. Ato janë dardha që u mblodhën për t’u ngrënë në sytë dhe nën përkujdesjen e kryeministrit. Kush thotë se Sajmiri lundronte në det me trafikantë dhe shefi i tij, nuk e dinte, është naiv. Kush beson se Arben Ndoka nuk u bë deputet për shkak të aftësive të tij në krim, ai nuk ka sy! Kush mendon se Tigri, akullorja, e të tjerë “ia hodhën” Edi Ramës, është idiot! Askush nuk ia hedh dot Edi Ramës! Thjesht janë prishur pazaret! SPAK ka në dorë, nëse ia mban, të gjejë një të penduar! Vetëm atëherë mund të pastrohen ujrat e zeza që i kanë shpërthyer Edi Ramës!

  • Qeveria dhe “Akademia e Krimit”

    Qeveria dhe “Akademia e Krimit”

    Njëmbëdhjetë vite eksperiencë në kultvimin e kanabisit, trafikimin e kokainës, krijimin dhe organizimin e grupeve kriminale dhe afrimi në majën e politikës, ka bërë që individët e përfshirë të kërkojnë edhe më shumë, për tu rritur në aspektin profesional. Nga krimi i vogël, me një strategji të saktë nën pushtetin e Rilindjes ata i kanë realizuar dhe tejkaluar planet e tyre…

    Ata janë me shumë para, armë, mjete të blinduara, informatorë në rangjet drejtuese të policisë, ndikues në qeveri duke u dhuruar vota deputetëve të përlyer, kryebashkiakëve duarndyrë në afera dhe pushtet të pafundmë në terrorizimin e qytetarëve që mendojnë ndryshe. Ky pushtet i madh politik dhe ekonomik, tashmë kërkon një menaxhim më të mirë, për të kaluar në një fazë tjetër. Nevojiten mësime sesi të kthehen në bosë të biznesit dhe pastrojnë paranë kryesisht në kulla ku lejen e marrin oligarkët me duarndyrët firmëtarë në bashki dhe qeveri.

    Edhe operacioni më i fundit që quhet i madh nga SPAK, lindi i vdekur. Nga 51 urdhër-arreste asnjë nuk është ekzekutuar për bosët e krimit, gjashtë prej të cilëve ikën pikërisht në ditën kur u lëshuan urdhër-arrestet me parimin e njohur të shefave të policisë që u dërgojnë haberin: ik se të kapëm… Mirëpo ajo që pushteti mësoi mirë nga “puna hulumtuese” e SPAK, është se kontigjenti i saj në botën e krimit, një prej të cilëve ish-deputet apo të afërm të deputetit aktual, duhen trajnuar sesi të sillen.

    Dhe koha thuhet se është për një tjetër vizion aftmesëm e afatgjatë, për planin e ri: “Shqipëria 2030”. Qeveria nuk mund të mos ua plotësojë nevojën aq të menjëhershme siç është nisma për hapjen e “Akademisë së Krimit”. Fondet janë, ekspertët gjithashtu, kërkesat për regjistrime shumë e madhe dhe mbi të gjitha në këtë ‘akademi’ do të japin mësim emra të njohur të politikës, krimit dhe mjeshtrave të pastrimit të parave. Në fund të sezonit do vlerësohen edhe nga përfaqësi oligarkësh dhe drejtues të institucioneve kyesore të vendit.

    Studentët që kanë mbarur me “medalje ari” janë të shumtë… Konsiderohen ekspertë në fushën e përdorimit të armëve, eleminimin e kundërshtarëve, largimin nga vendi i ngjarjes dhe fshehja e gjurmëve të krimit, ku si metodën më të përdorur me shumë sukses është djegia e automjeteve që përdorin në momentet e eleminimit fizik të rivalëve. Po ashtu në 11 vitet e qeverisjes së fundit kuptuan se të lidhesh me drejtues të lartë të policisë dhe t’i shërbesh pushtetit në kohë fushate ishte një bonus i madh që ata ta vijojnë pa teklif aktivitetin.

    Provat janë ashiqare. Disa u bënë deputetë teksa ishin me armë në brez, të tjerë drejtorë të rëndësishëm, ca kryebashkiakë, e aq më shumë ndikues lokal në tjetërsimin e pronave, përfshirjen në tenderat publikë, raprezaljen mbi kundërshtarët dhe lidhjen me elitën e policisë, që natën e lajmëron për ndonjë urdhër-arresti dhe ditën bën sikur i kërkon kudo.

    Disa prej bosëve të krimit, me shoqëri të zgjeruar pranë tavës së pushtetit kanë ikur në Dubai, më shumë për t’i shpëtuar hakmarrjes ndaj rivalëve sesa prangave të policëve të ndershëm që tradhtohen nga shefat. Koha po ndryshon… Flitet gjithnjë e më tepër për këtë “Akademinë e Krimit”. Shumë po bëhen gati të kthehen nga Dubai dhe të vihen në rresht për të perfeksionuar veprimtarinë e tyre kriminale. Duan të kalojnë një shkallë më lart. Dhe qeverisja këtë ua ofron.

    Plani është i gatshëm teksa krahas kërkesave për regjistrim të “studentëve ekselentë” në krim, bie në sy individë nga Fushë-Kruja, Laçi, Durrësi, Vlora dhe Elbasani, interes të madh shprehin edhe “profesorët” që do të japin mësim. Një kryebashkiak shumë i rëndësishëm në vend me llërë të përveshura dhe me eksperiencë shumë të gjatë në dhënien e lejeve të ndërtimit pritet të emërohet “Dekan”, teksa do të jetë profesor në lëndën e rëndësishme: “Pastrimi i parave në ndërtim dhe binjakëzimi me Ndragetën”.

    Profesori “punëmbaruar”, është mjaft i ditur. Që nga viti 2015 ai studion dhe koncepton idenë e pastrimit të parave në ndërtim. Gjithashtu si temë interesente me disa cikle seminaresh të përgatitura nga ky ‘akademik i njohur’ është: “Trendi 5D, si të behesh milioner me tenderat publikë”.

    Pedagogë të jashtëm pritet të jenë deputetë me të shkuar kriminale, drejtorë me eksperiencë të gjatë në grabitjen e vilave luksoze në botë dhe skifterë të Rilindur nga pushteti. Po ashtu rektor me të shkuar të shkëlqyer si hetues i komunizmit dhe ish-ministër i rëndësishëm do mbulojë disa fusha të ndryshme siç është: Si të ndryshojmë ligje dhe bëjmë amnisti kur vëllai është dënuar për trafik droge; apo krimi mbulohet me bashkëpunimin e ndërkombëtarucëve në vend. Një tjetër ish-ministër fort i rëndësishëm do të mbulojë fushën e narkotikëve dhe japë leksione si të jesh në majën e pushtetit dhe bashkëpunosh me kushërinjtë për të trafikuar drogë drejt Italisë.

    Po ashtu leksione me shumë interes janë edhe ata të mbylljes së dosjeve kur del në përgjime, apo si të përdorësh propagandën teksa nga llumi që je zhytur, të dalësh “akullore”. Aq seriozosht do merret kjo akademi sa një ministre mendon ta bëjë edhe film, ndërsa një kryeakademik në politikë, i vëtëshpallur “lider rajonal”, do të mësojë studentët si të përdorësh paratë e krimit për të mbajtur poshtet dhe si po me këta para të përdorësh pushtetin për ta kthyer krimin në majën e elitës që batakçiun ta bëjë zyrtar, ndërsa të akuzuarit për trafik droge, prostitucioni, përdhunuesit dhe të akuzuarit për vrasje ti bëjë deputetë dhe kryebashkiakë.

    Edhe pse dështoi nisma për “Akademinë e Çobenjve”, qeveria jo vetëm nuk tërhiqet, por është e bindur se me vizionin “Shqipëria 2030” ngritja e “Akademisë së Krimit” do të ketë sukses të jashtëzakonshëm. Në vitin e dytë akademik, nismëtarët janë të bindur se do të tërheqin edhe “studentë” të huaj me eksperiencë në narkotrafik që vijnë nga Kolumbia, Peruja apo Meksika…

  • Nga Erion DASHO – Vaksinat dhe pandemia “X”

    Nga Erion DASHO – Vaksinat dhe pandemia “X”

    Tërheqja nga tregu e vaksinës së prodhuar nga firma AstraZeneca dhe Universiteti i Oksfordit, hapi sërish diskutimet mbi teoritë konspirative, tip mikroçipash, plandemi, manipulim gjenetik, etj.

    E vërteta është shumë e thjeshtë.

    AstraZeneca e tërhoqi vaksinën nga tregu, sepse sot ekzistojnë vaksina më të sigurta dhe nuk ka më presion për të vaksinuar sa më parë qindra milionë apo miliarda njerëz. Nuk ka as edhe presion për të përdorur vaksina me kosto më të ulët. Pandemia ka përfunduar dhe bashkë më të edhe emergjenca.

    Paralelisht, deklaratat e OBSH-së dhe institucioneve të shëndetit publik nga vende të ndryshme mbi pandeminë e pritshme “X” sërish kanë trazuar gjakrat dhe mendjen e konspiracionistëve.

    Edhe këtu e vërteta është sërish e thjeshtë.

    Njerëzimi ka bashkëjetuar me pandemitë që kur nisi bashkëjetesa në qytete e mijëra, dhjetëra mijëra, më pas qindra mijëra, ndërsa sot e dhjetëra milion njerëzve. Lija, murtaja, kolera, gripi, koronaviruset, etj., kanë shkaktuar disa prej pandemive më famëkeqe të historisë.

    Ndërsa bakteret nuk mund të shkaktojnë më pandemi për shkak të antibiotikëve, viruset ende vazhdojnë dhe do të vazhdojnë të përbëjnë rrezik. Është vetëm çështje kohe para se virusi i radhës të shkaktojë pandeminë e radhës. Duke qënë se mjekët nuk janë fallxhorë, ata nuk mund të parashikojnë shkaktarin dhe prandaj edhe e kanë quajtur atë “shkaktari X”.

    Qeveritë, institucionet kërkimore, kompanitë e biznesit, organizatat ndërqeveritare, etj., janë duke punuar me shumë përkushtim që vaksina kundër pandemisë së radhës të mos prodhohet më për 300 ditë (aq kohë sa u nevojit për të prodhuar vaksinën anti-COVID), por brenda 100 ditëve. Me siguri do të jetë një algoritëm i Inteligjencës Artificiale që do të ndihmojë shkencëtarët së bashku me përvojën organizative dhe teknologjike të grumbulluar gjatë pandemisë që sapo kaloi. Kjo do të bëjë të mundur që nga pandemia e radhës të mos vdesin më 15 milion apo më tepër persona, por shumë më pak, ndoshta një fraksion i vogël i këtij numri.

    Qytetarët e përgjegjshëm, të cilëve u dhimbset jeta e tyre, e fëmijëve të tyre, e prindërve të tyre, etj., nuk duhet të dëgjojnë e besojnë konspiracionistët, por të kenë mendjen tek rekomandimet e EMA-s, FDA-së, RKI, etj.

    Duke ndjekur shkencën dhe jo konspiracionistët shpëtohen jetët dhe mbrohet shëndeti; dje, sot dhe në të ardhmen.

    Çdo rrugë tjetër është rrugë pa krye…